Məlum olduğu kimi, Ruben Vardanyan Azərbaycanın xaricdəki diplomatlarına qarşı “Nemezis-2” terror əməliyyatının başlanılması təşəbbüsündə ittiham olunur. Bakıda keçirilən məhkəmə prosesində məlum olub ki, Ruben Vardanyan şəxsən tərtib etdiyi fəaliyyət planında Azərbaycanın xarici ölkələrdə olan diplomatik korpusunun nümayəndələri, xidməti vəzifələrini və ictimai borcunu yerinə yetirən vətəndaşlarına qarşı terrorçuluq törədilməsi üçün “Nemezis-2” terror əməliyyatının başlanılması təşəbbüsünü irəli sürüb.
Xatırladaq ki, Azərbaycanın xarici ölkələrdəki diplomatik nümayəndələrinə qarşı terror aktlarının təşkili Ermənistan üçün yeni məsələ deyil. Ermənistan, eləcə də bir çox erməni diaspor təşkilatları bugünə qədər xarici ölkələrdəki Azərbaycan və Türkiyə diplomatlarına qarşı çoxsaylı terror aktları törədib, onlarla diplomatımızı qətlə yetiriblər. Bu baxımdan Ruben Vardanyanın köhnə ənənəni yeni adla – “Nemezis-2” şəklində gündəmə gətirməsi təəccüblü deyil.
Ruben vardanyanla bağlı keçirilən məhkəmə prosesi göstərdi ki, vaxtiylə Qarabağ və ətraf rayonları işğal edərək Cənubi Qafqazda terror rüzgarı əsdirən Ermənistan, dünən olduğu kimi bu gün də dünyanın bir nömrəli “terror ixracatçısıdır”. Terroru öz məkirli məqsədlərinə çatmaqda əsas vasitə hesab edən Ermənistan, Ruben Vardanyanın timsalında nə qədər qorxunc və təhlükəli olduğunu bir kəs daha nümayiş etdirməkdədir. Məhkəmə prosesi göstərir ki, erməni terrorunun miqyası sərhəd tanımır və dünyanın istisnasız olaraq hər bir bölgəsini əhatə edir. Başqa sözlə desək, erməni terroru sərhədsiz, miqyassızdır.
Bu isə o deməkdir ki, bütün dünya erməni terroruna qarşı mübarizədə aktiv olmalı, Azərbaycanın bu terrora qarşı mübarizəsini dəstəkləməlidir. Əks təqdirdə, yalnız azərbaycanlıları deyil, dünyamızdakı heç kəsi erməni terrorundan sığortalamaq mümkün olmayacaq.
Seymur ƏLİYEV
