Bu gün dünya nizamı heç vaxt olmadığı qədər təhlükəli meyillər üzərində qurulur və yeni nizamın formalaşması üçün beynəlxaq platformalarda diskusiyaların, fikir mübadilələrinin aparılmasına çox ehtiyac var. 2021-ci ildə qurulan Antalya Diplomatik Forumu xüsusilə regional müstəvidə dialoqun yaradılması, problemlərin müzakirəsi və həlli üçün mühüm platformaya çevrilib. Ölkəmiz də bu forumun fəal iştirakçılarındandır. Azərbaycan nümayəndə heyətinin builki foruma Prezident İlham Əliyevin rəhbərliyi ilə qatılması təsadüfi deyil. Mövcud geosiyasi proseslər, xüsusilə ABŞ-da Donald Trampın hakimiyyətə gəlişindən sonra baş verənlər regiondakı hadisələrə təsir edir. Bu forum regionun gələcəyinin müzakirəsini daha da aktualaşdırır. Həmçinin Azərbaycan bölgənin aparıcı ölkələrindən biri kimi perspektivlərin müzakirəsinə, həmçinin bölgənin gələcəyi ilə bağlı atılacaq addımlara mühüm töhfə verə bilər. Nəhayət, forum rəsmi Bakı üçün həm də iştirakçı ölkələrlə təmasların qurulması baxımından əhəmiyyətlidir. Bu gün Azərbaycan təkcə Cənubi Qafqazda baş verən proseslərdə deyil, eyni zamanda Yaxın Şərqdəki gərginliklərin azaldılmasında da fəal iştirak edir. Bu gün Suriyada , Qəzzada və eləcə də İsraillə Türkiyə arasındakı münasibətlərin normallaşmasında Azərbaycan aparıcı rola malikdir. Bu da Azərbaycanın regional yox, həm də qlobal proseslərdə iştirakını şərtləndirən amillərdir. Qürurla qeyd edə bilərik ki, Azərbaycan artıq regional məsələlərlə yanaşı qlobal proseslərə təsir imkanlarına sahibdir. Forum çərçivəsində Azərbaycan Prezidenti Suriya, Sudan, Türkiyə, Gürcüstan və digər dövlətlərin liderləri ilə ikitərəfli görüşlər keçirib. Bu görüşlərdə həm Cənubi Qafqazda, həm Yaxın Şərqdəki məsələlər müzakirə edilib. Forum çərçivəsində Azərbaycan liderinin diplomatik təmasları, ölkəmizin panel iclaslardakı mövqeyi Suriya ilə bağlı, İran və İsrail ilə əlaqədar olan mövzularda müzakirələr, nəticə və yaranmış durumun həll yolları üzərində hansı işlərin görülməsini şərtləndirəcək. Azərbaycanın keçmiş Qarabağ probleminin həllindəki böyük təcrübəsi regionda hazırki gərgin durumdan çıxış yollarının tapılmasında da öz töhfəsini verəcək.
Antalya forumunun məzmunu, sadəcə bir regional problemə diqqət çəkməklə məhdudlaşmadı. Bu konfrans, eyni zamanda Qərbi Azərbaycan mövzusunun beynəlxalq hüquq, insan haqları və tarixi ədalət prizmasından dəyərləndirilməsi baxımından da xüsusi əhəmiyyət kəsb eetmiş oldu. Qərbi azərbaycanlıların öz doğma yurdlarına qayıdış hüququnun təmin olunması məsələsi yalnız Azərbaycan üçün deyil, bütövlükdə beynəlxalq hüququn nüfuzunun qorunması baxımından da önəmli sınaqdır.Antalya Diplomatiya Forumunda Qərbi Azərbaycan məsələsinin gündəmə gətirilməsi bu istiqamətdə həyata keçirilən strategiyanın artıq regional və beynəlxalq platformalarda öz siyasi çəkisini və təsir imkanlarını göstərdiyini nümayiş etdirdi.
Bütün bu fəaliyyətlər fonunda Prezident İlham Əliyevin Antalya Diplomatik Forumunda iştirakı Azərbaycanın dünya siyasətində mühüm söz sahibi olan dövlətə çevrildiyini bir daha nümayiş etdirir. Azərbaycan bu gün yalnız enerji və nəqliyyat sahələrində deyil, həm də sülh, əməkdaşlıq və dayanıqlı inkişaf naminə beynəlxalq birlikdə fəal mövqe tutaraq, regionun və dünyanın gələcəyinə töhfə verir. Azərbaycan yalnız regionda deyil, həm də qlobal miqyasda etibarlı tərəfdaş və təşəbbüskar dövlət kimi qəbul edilir. Dövlətimizin başçısının beynəlxalq münasibətlər sahəsində zəngin təcrübəsi, strateji baxışları və praqmatik yanaşmaları onu beynəlxalq platformalarda böyük maraqla qarşılanan Liderə çevirib.
Fəzail İbrahimli
Milli Məclisin deputatı
