Sosial şəbəkələrdə və mediada xaricdə təhsil alan tələbələrin Azərbaycan universitetlərinə köçürülməsinə süni əngəllər yaradıldığına dair iddialar paylaşılır. Tələbələr iddia edib ki, ya onlara kredit sayı bəhanəsi ilə, ya da YÖS imtahanı ilə bağlı müxtəlif arqumentlər səbəb göstərilir və köçürülmə prosesi həyata keçirilmir. Belə ki, tələbələrin sözlərinə görə, onların böyük hissəsi 2023-cü ildə Türkiyə dövlət universitetlərinin keçirdiyi YÖS imtahanı ilə ali məktəblərə qəbul olunub, lakin agentlik onlara yalnız TR-YÖS nəticələri etibarlı olduğunu deyir. Hətta bəzi tələbələr Təhsildə Keyfiyyət Təminatı Agentliyinə köçürülmə ilə bağlı rəsmi şəkildə 250 manat dövlət rüsumunun ödədiyini və köçürülmə üçün şəhadətnamə də aldığını iddia edib. Bu səbəbdən xaricdə təhsil alan tələbələrin Azərbaycan universitetlərinə köçürülməsi ilə bağlı Azərbaycan Respublikası Elm və Ali Təhsil üzrə Dövlət Agentliyi tərəfindən kütləvi imtinalar gəldikdən sonra tələbələr Apellyasiyaya müraciət edib. Elm və Təhsil Nazirliyi Tələbə köçürülməsi ilə bağlı Apellyasiyaya müraciətlərinin nəticələrinin avqust ayının sonunadək elan olunacağını bildirmişdi. Köçürülmə ilə bağlı müddəaların yer aldığı Elm və Təhsil Nazirliyinin KQ2 nömrəli qərarına əsasən, apellyasiya müraciətlərinə 10 gün ərzində baxılıb cavab verilməlidir. Lakin artıq Nazirliyin elan etdiyi tarixdən də xeyli müddət keçməsinə baxmayaraq nəticələr açıqlanmayıb. Bu da tələbələr arasında ciddi suallar doğurur: Nazirliyin nəticələri gecikdirməsinin səbəbi nədir?
Xatırladaq ki, köçürülmə nəticələri elan olunarkən tələbələrdən kütləvi narazılıqlarına cavab olaraqElm və Ali Təhsil üzrə Dövlət Agentliyinin direktor müavini Nicat Əsədli mətbuatda vaxt çıxış edərək tələbələrin Konstitusion hüququ olan apellyasiya hüququnu “şad xəbər” kimi təqdim etmişdi. Buna baxmayaraq, artıq nəticələrin elanından bir ay keçsə də, apellyasiya prosesinin yekunları ictimaiyyətə açıqlanmayıb.
Tələbələrin iddiasına görə, Agentlik kütləvi şəkildə imtina cavabları verib və bu qərarlar həm Nazirlər Kabinetinin 348 nömrəli qərarına, həm də KQ2 nömrəli qərara ziddir. İmtina alanlar arasında beynəlxalq imtahan nəticələri ilə xaricdə oxumağa qəbul olunmuş tələbələr, eləcə də olimpiada çempionları və universitet birinciləri də yer alır. Məsələnin digər tərəfi isə apellyasiya prosesinin şəffaflığı ilə bağlıdır. Tələbələr və ictimaiyyət haqlı olaraq soruşur: Apellyasiya müraciətlərinə niyə vaxtında cavab verilmir və Agentlik niyə rəsmi statistikanı açıqlamır? Və nəhayət ən əsası, apellyasiya nəticələri nə vaxt elan olunacaq? Nazirlikdən bu suallara hələ ki cavab yoxdur
