Ukraynadakı müharibənin daha da azğınlaşdırdığı Rusiyadakı rus qatı millətçiliyi, imperiyaçılığı, şovinizmi və digər çirkin əlamətlər özünü gündən-günə daha açıq və eybəcər şəkildə büruzə verməkdədir. Sanki Ukraynadakı uğursuzluğun, məğlubiyyətin heyfini Rusiyada yaşayan qeyri-ruslardan, miqrantlardan, müsəlmanlardan çıxmaq barədə əmr verilib. Kreml təbliğatının bu prosesə dəstək verməsi, bəzi hallarda isə körükləməsi isə onu göstərir ki, doğrudan da bu iyrənc kampaniyanın, xüsusilə anti-müsəlman fəaliyyətlərin arxasında elə Kremlin özü durur…
Son günlər Rusiyanın ayrı-ayrı şəhərlərində Kremlin xeyir-duası ilə yaradılmış “rus icması” təşkilatları özlərini bir zamanların “skinxedləri” kimi aparmaqdadırlar. Rusiya şəhərlərində bu “icma” nümayəndələri dəstə-dəstə toplaşaraq, çox vaxt içkili vəziyyətdə qeyri-ruslara qarşı “reydlər” keçirirlər. İnsanlar təhqir və təhdid olunur, bir çox hallarda döyülür, əmlakı əlindən alınır, fiziki zorakılığa məruz qalırlar.
Son günlər Rusiya sosial şəbəkə səhifələrində islamafobiya xarakterli, hətta açıq cinayət tərkibi olan xeyli sayda videogörüntülər yayımlanıb. Bu videolarda bəzi şəhərlərdə məscidlərin yandırılmasını, yaxud qapısına donuz başı qoyulmasını əks etdirən görüntülər var. Bunlardan biri Adıgey respublikasında qeydə alınıb. Qeyd edək ki, bu respublikada müsəlman adıgeylərlə yanaşı, xeyli sayda pravoslav xristianlar və ermənilər yaşayır. Beləliklə, buradakı rayonların birində yerləşən məscidin qapısına donuz başı qoyulub və hadisə telefonla lentə alınıb. Hələlik, hüquq-mühafizə orqanlarından heç bir səs-səmir çıxmır. Son zamanlar bu cür təxribatlar və açıq islamafob hərəkətlər sürətlə artır və digər regionalrda da qeydə alınır.
Digər videolarda “xaç yürüşləri” və “rus icması”nın kütləvi yürüşlərini görmək olar. Bütün bunlar əlbəttə ki, yerli icra və hüquq-mühafizə orqanlarının xeyir-duası ilə həyata keçirilir. Ancaq nəzərə almaq lazımdır ki, bunu təşkil edən “vətənpərvərlər” son nəticədə Rusiyanın dövlət olaraq təməlini minalayırlar. Belə görünür ki, Kremldə oturanlar belə davam etsə, bu prosesin nə ilə nəticələnəcyini öncədən görməyəcək qədər kordurlar.
C.Məmmədli
“AzPolitika.info”
