Azərbaycan Mərkəzi Bankı 2025-ci ilin ilk yarısında ölkəyə xaricdən daxil olan pul köçürmələri ilə bağlı statistikanı açıqlayıb. Musavat.com xəbər verir ki, rəqəmlərə görə, yanvar–iyun aylarında Azərbaycana ümumilikdə 533,9 milyon dollar göndərilib.
Mərkəzi Bankın Statistika departamentinin direktoru Samir Nəsirovun sözlərinə görə, köçürmələrin böyük hissəsi Rusiyadan gəlib. Belə ki, 2025-ci ilin ilk yarısında Rusiyadan Azərbaycana 214 milyon dollar pul göndərilib.
Ötən ilin yekunlarına görə isə bu göstərici 497 milyon dollar olub ki, bu da bütün xaricdən gələn köçürmələrin təxminən yarısını təşkil edib.
Qeyd edək ki, Azərbaycana pul göndərişlərinin digər istiqamətləri arasında Türkiyə, Avropa ölkələri və ABŞ da var. Amma statistik baxımdan birinci yerdə ənənəvi olaraq Rusiya dayanır.
Bu köçürmələrin mühüm bir hissəsi Azərbaycanın müxtəlif bölgələrində yaşayan ailələr üçün sosial dəstək rolunu oynasa da, diaspor nümayəndələri həm də mədəni layihələrə və ictimai təşəbbüslərə vəsait yönəldirlər.
Mardanın açıqlaması: təxribat və təhqir
Lakin məlum statistikanı Kremlin təbliğat maşınının əsas fiqurlarından biri olan Sergey Mardan öz üslubunda şərh edib. O, sanki Azərbaycanın Rusiyadan asılı olduğunu göstərməyə cəhd edərək, pul köçürmələrinin həcmini “təmtəraqlı şəkildə” qabardıb. Mardan iddia edib ki, “bu il Azərbaycana Rusiyadan 300 milyona yaxın, ötən il isə 400 milyondan çox pul köçürülüb və bu, ölkəyə daxil olan ümumi vəsaitlərin böyük hissəsini təşkil edir”.
Əslində isə Rusiyada çalışan 2 milyondan çox azərbaycanlı əmək miqrantı bu vəsaitləri qazanaraq öz ailələrinə göndərir. Onların fəaliyyəti ilk növbədə Rusiyanın öz iqtisadiyyatına, sosial rifahına və vergi sisteminə fayda verir. Azərbaycanlılar Rusiyada ən böyük və fəal etnik əməkçi qrup olaraq ölkənin iş həyatına ciddi töhfə verirlər.
Mardanın bu faktı Azərbaycanın üzünə “göstəriş” kimi təqdim etməsi isə həm həqiqətlərin təhrifidir, həm də təxribat xarakteri daşıyır. Təəssüf ki, o, bu üslubdan tez-tez istifadə edir.
Pul köçürmələri Azərbaycanın iqtisadi və sosial həyatında mühüm rol oynayır, amma bunun ölkənin Rusiyadan asılılığı kimi qələmə verilməsi doğru deyil. Əksinə, Rusiyada çalışan azərbaycanlıların zəhməti həm Azərbaycan ailələrinə, həm də Rusiyanın öz iqtisadiyyatına fayda gətirir.
