Nəqliyyat naziri: ” Siz kütləvi xaos görəcəksiniz, çoxlu reyslər ləğv olunacaq və biz hava məkanlarını bağlaya bilərik”
Musavat.com xəbər verir ki, ABŞ-da hökumətin fəaliyyətinin dayandırılması (“şatdaun”) nəticəsində aviasiya sistemində ciddi böhran yaranıb. Milli Aviasiya Dispetçerləri Assosiasiyasının rəhbəri Nik Deniyels Konqresi vəziyyəti dərhal dayandırmağa çağırıb və əməkdaşların “siyasi alətə” çevrilməsinə etiraz edib.
ABŞ Nəqliyyat naziri Şon Daffi isə bildirib ki, böhran davam edərsə, bəzi bölgələrin hava məkanı təhlükəsizlik səbəbindən bağlana bilər:
“Siz kütləvi xaos görəcəksiniz, çoxlu reyslər ləğv olunacaq və biz müəyyən hava məkanlarını bağlaya bilərik. Sadəcə bunun öhdəsindən gələ bilmirik, çünki aviadispeçerlərimiz yoxdur”, – deyə Daffi xəbərdarlıq edib.
Nazirin sözlərinə görə, minlərlə aviadispeçer artıq əməkhaqqı ala bilmir:
“Onlar birinci maaşın yalnız 80–90 faizini alıblar, ikinci maaş isə ümumiyyətlə ödənilməyib. Cümə axşamı onlara göndəriləcək maaş bildirişində ‘0’ yazılacaq. Bir çoxu bir maaşsız dövrə tab gətirə bilərdi, amma iki maaşsız dövrə heç kim dözə bilməz. Əgər bu vəziyyət bir həftə də davam edərsə, kütləvi xaos baş verəcək.”
Mətbuata görə, artıq 3,2 milyonadək sərnişin uçuşların gecikməsi və ləğvi səbəbindən zərər çəkib. ABŞ-ın hava nəqliyyatı sistemi çökmə təhlükəsi ilə üz-üzədir və ekspertlər xəbərdarlıq edirlər ki, bu temp davam edərsə, ölkənin hava məkanının bir hissəsi bağlana bilər.
Ağ Ev də məsələ ilə bağlı açıqlama yayıb. Ağ Evin mətbuat katibi Karolin Livitt Demokratları hökumətin fəaliyyətini bərpa etməyə çağıraraq bildirib ki, “hava gəmiləri göydən düşməyənə qədər hökuməti açmayacağıq” kimi açıqlamalar qəbuledilməzdir:
“Bu, məsuliyyətsiz və təhlükəli bəyanatdır. Biz federal hökumətin işini bərpa etməklə bu xaosu və ABŞ-ın hava hərəkətinin idarə olunmasındakı iflası dayandırmaq istəyirik. Artıq 35 gündür ki, Demokratlar hökuməti bağlı saxlayırlar, aviadispeçerlər isə hələ də maaşsız işləyirlər. Bütün böyük aviaşirkətlər Demokratlara müraciət edərək, hökumətin açılmasını tələb ediblər,” – deyə Livitt vurğulayıb.
Ağ Ev rəsmisi əlavə edib ki, qarşıda Şükranlıq bayramı mövsümü yaxınlaşır və milyonlarla amerikalı səfərə hazırlaşır:
“Amerikalılar öz Demokrat nümayəndələrinə açıq şəkildə bildirməlidirlər ki, hökumət dərhal işə başlamalıdır. Əks halda, bu vəziyyət ölkənin aviasiya sistemini tam çökdürəcək.”
