Avroliqa oyunları çərçivəsində yarışlarda iştirak edən bizim media nümayəndələrinın qarşısında UEFA tərəfindən bəzi qadağalar qoyulub.
Mia.az xəbər verir ki, “Qarabağ”-“Çelsi” oyununa akkreditasiya üçün müraciət edən media nümayəndələri tətbiq olunan yeni tələblər və qadağalarla bağlı klubun mətbuat xidmətindən məlumat alıblar.
UEFA-nın mix zona və media tribunadan istifadə zamanı təsdiqlədiyi bəzi qaydalar əvvəldən mövcud idi. Bəzi bəndlər əlavə edilib və bunlar jurnalistlərin foto-video çəkiliş aparması və canlı yayım açması ilə bağlıdır.
Bildirilir ki, “media tribunadan mobil telefon vasitəsilə çəkiliş və ya canlı yayım aparmaq qadağandır. Həmçinin fotoqrafların da stadion ərazisində video çəkiliş aparması qəti şəkildə qadağandır. Bu tələbin pozulması halında akkreditasiya dərhal ləğv edilə bilər və gələcək oyunlara akkreditasiya verilməməsinə səbəb ola bilər”.
Bizə daxil olan məlumata görə, UEFA bizim jurnalistlərin özünü azarkeş kimi aparmasından narahatlıq keçirir. Medianın tərəfsizliyi prinsiplərinin pozulduğunu bildirən UEFA nümayəndələrinin fikrincə, bizimkilər özünü jurnalist kimi yox, azarkeş kimi aparır ki, bu da UEFA prinsiplərinə ziddir.
“Kopenhagen”lə olan sonuncu oyundan sonra isə, eşitdiyimizə görə, əcnəbi jurnalistlər media tribunada səs-küydən və işləyə bilmədiklərindən şikayətlənib.
Əcnəbi həmkarlarımız həmçinin bizi, media otağında öz aramızda hay-küylə danışmaqda qınayıb və beləliklə, psixoloji iş mühitinin yaradılmamasından narazı qalaraq çıxıb gediblər.
Zülfiyyə Mustafayeva
Mia.az
