Bakı şəhər sakini Elman Nəsirov kursa getdiyi şirkətin rəhbərliyi tərəfindən aldadıldığını iddia edir.
Bununla bağlı Musavat.com-a müraciət edən E. Nəsirov bildirib ki, elektron ticarət sistemini öyrənmək məqsədi ilə bir neçə il öncə “Amazon Edu” şirkətində kursa yazılıb və buna görə şirkətin hesabına 5 min manat ödəyib.
O, burada şirkətin rəhbəri Rəşad Səmədovla tanış olub. Şikayətçinin sözlərinə görə, şirkət rəhbəri ona ortaqlıq təklif edib:
“Amazon Edu” şirkəti ilə “İnstagram” üzərindən əlaqə yaratmışdım. Onlayn ticarət üzrə peşəkarlaşmaq üçün kurs almaq istəyirdim. Çindən ABŞ bazarına onlayn yolla məhsul gətirmək və ticarətlə məşğul olmağı planlaşdırırdım. Rəşad Səmədovla da elə orada tanış oldum. Onun “Bakuexport” adlı tranzit şirkəti var.
Kursa gedən zaman Rəşad bildirdi ki, onun hazır onlayn dükanları var, pulu həmin dükanlardan birinin hesabına yatırım və dövriyyədən qazanılan pullar mənim yeni yaradılacaq dükanımın hesabına yerləşdirilsin.
Bu yolla mən oraya 63 min manat yatırım etdim. Həmçinin kursa əlavə olaraq 5 min manat pul ödədim. O pulu yatırım edəndən sonra mənə 2 ay ərzində 15 minə yaxın ödəniş etdilər, lakin 2 aydan sonra gəlirlər dayandırıldı. Bildirildi ki, pulu ölkədən qanunsuz şəkildə çıxardıqları üçün ABŞ banklarında bloka düşüb və hesab bağlanıb. Beləliklə, nə kursu təhvil verdilər, nə də pulumu qaytardılar.
Daha sonrakı mərhələdə isə o hesabı blokdan çıxarmaq adı ilə Rəşad məndən hissə-hissə 30 min manat pul aldı. Hətta hədə-qorxu gələrək adıma telefon götürdü. Deyirdi ki, adıma telefon götürüb verməsəm, işimi batıracaq. Bu günə qədər mən ödədiyim pulu geri ala bilmirəm. Mənə deyir ki, “əli uzundur”, hara istəyirəmsə, şikayət edim, o, hər zaman qurtulacaq.
Nərimanov Rayon Polis İdarəsinə müraciət etdim və şikayətimi bildirdim. Onu idarəyə çağırdılar və bir saat sonra Rəşad mənə zəng edib dedi: “şikayət etdin nə oldu ki? Mənə heç kim heç nə edə bilməz”.
İndi isə ölkədə olub- olmadığını bilmirəm. Bir məqamı da qeyd edim ki, Rəşad sabiq deputat Abutalıb Səmədovun qardaşı oğludur.
Mən Bakı şəhər Nərimanov rayon prokurorluğunda da oldum, prokuror dedi ki, ağlın var idisə, pulu verməzdin. Rəşadın bacanağı Qaxda prokurordur, özü isə bir zamanlar MTN-də işləyib. Hər yerdə tanışı var. Onun barəsində cinayət işi açılsa da, iş yubadılır. Yeri gəlmişkən, qeyd edim ki, “Ramtur” şirkəti də ona məxsusdur”.
Musavat.com iddialarla bağlı Rəşad Səmədovla əlaqə yaratmağa çalışsa da, onun nömrələrinə zəng çatmayıb. Qarşı tərəfin mövqeyini dərc etməyə hazırıq.
Şahanə Rəhimli
Musavat.com
