Bir zamanların “fövqəlgeneral”larından olan Vüsal Novruzov yenidən aktivləşmək istəyir. Bir sıra dostları kimi, o da özünü mətbuatda “Ramiz Mehdiyevin “vurdurduğu” kadr” kimi təqdim etmək niyyətindədir.
Bakı Baş Gömrük İdarəsinin sabiq rəisi olan Vüsal Novruzov daha çox fövqəladə hallar naziri Kəmaləddin Heydərovun şirkətlərinin “qeyri-rəsmi mühasibi” kimi anılıb. Onun sabiq DGK sədri Səfər Mehdiyev ilə apardığı mübarizədə məğlub olduğu da bilinir.
Ancaq hazırda öz şəxsi biznesi ilə məşğul olan generalın yenidən vəzifəli vaxtlarını arzuladığı və bunun üçün də özü ilə bağlı piar kampaniyasının konturları üzərində işlədiyi vurğulanır. Plana görə, vəzifədə ikən və daha sonra da əlaqədə olduğu Azərbaycandakı “Fətullahçı” şəbəkənin media resursları və nüfuz agentlərindən istifadə edərək cəmiyyətdə özünün müsbət obrazını yaradacaq və “yuxarılar”a hazırda işlərin o qədər də yolunda getmədiyi gömrük sistemində nələrisə dəyişə biləcəyini göstərmək üçün şans istəyəcək.
FETÖ-nün Azərbaycandakı şəbəkəsinə ən böyük maddi dəstək olan şəxslərdən biri sayılan Vüsal Novruzov özü barədə nə qədər pozitiv imic yaratmaq istəsə də, onun dövründəki Bakı Baş Gömrük İdarəsi barədə şikayətlər, eyni zamanda, özünün zərərli vərdişləri və korrupsiya bataqlığına qərq olması gerçəkliyi bunun qarşısında ən böyük maneədir. Bu iddialar ortadan qalxmadıqca Vüsal Novruzovun yenidən “dirilməsi” mümkünsüz görünür.
