Şəmistan Nəzirli niyə dəyərlidir? – bunu demək olar ki, yaxşı bilirik. Bir də qısaca öz fikrimi yazım: Şəmistan Nəzirli ona görə dəyərlidir ki, Azərbaycan xalqının Qəhrəman oğullarının döyüş yolunu, xidmətini, Qəhrəmanlığını Azərbaycanın hüdudlarından uzaqlarda yerləşən arxivlərdən araşdırıb xalqa tanıtdı, sevdirdi və Qəhrəmanların Dastanını yazdı.
Bizim əlimizdə qələm, ruhumuzda söz. Ancaq hərdən susuruq, yavaşıyırıq. Yazırıq. Amma, ancaq və lakin. Az yazırıq. Həm də çox az.
Bu şəkil Azərbaycan Ordusunun Qələbəsi üçün xüsusi əhəmiyyət kəsb edən əməliyyatdan sonra Qəhrəman Zabitlərin təltif olunma mərasimindəndir. Xüsusi Təyinatlı Qüvvələrinin Qəhrəman oğulları düşmənin arxasında elə möhtəşəm əməliyyat keçirirlər ki, həmin əməliyyat Ordumuz üçün qələbənin sütunu hesab olunurdu. Həmin tapşırıqda fərqlənən Xüsusi Təyinatlılar Cənab Prezident İlham Əliyev tərəfindən mükafatlandırılır. Mühüd Orucov həmin tapşırıqda Xüsusi Qəhrəmanlıq göstərir.
Şəkildə Azərbaycan Silahlı Qüvvələrinin Ali Baş Komandanı cənab İlham Əliyev, Azərbaycan Respublikasının Müdafiə Naziri, general-polkovnik Zakir Həsənov, Azərbaycan hərbi xadimi, general-polkovnik, Azərbaycan Respublikası müdafiə nazirinin müavini — Quru Qoşunların komandanı, Xüsusi Təyinatlı Qüvvələrin sabiq komandanı, Vətən Müharibəsi Qəhrəmanı Hikmət Mirzəyevlə birlikdə “Xüsusi Təyinatlı Qüvvələrinin Görən Gözü”, “Kəşfiyyatın Mixaylosu” adlandırılan Tabor komandiri Şəhid kapitan Mühüd Orucov da yer alıb.
Bu Tarixi şəkildir. Müzəffər Ali Baş Komandanın təltif etdiyi Qəhrəmandır Mühüd Orucov. Mühüd Orucov 2014-cü ildə Ağdərədə keçirilən döyüş əməliyyatında Şəxsi Rəşadəti ilə Azərbaycan hərb tarixinə Qəhrəmanlıq salnaməsi yazıb.
Xahiş edirəm, yazın. Vaxtınız olanda yazın. Arada vaxt edin yazın Mühüd üçün . Bütün işlərinizi bir kənara atıb, Mühüd üçün yazın, xahiş edirəm. Mühüd Vətənin bütövlüyü uğrunda ən ağır əməliyyatlara getdi. Qorxmadı, çəkinmədi.
Mühüd və Şəhid dostları bir günə yaxın Talış yüksəkliyinin azadlığını zirehli texnika olmadan düşməndən qoruyublar. Düşmənin tankı onların üstünə gələndə Mühüd tankın qarşısından çəkilməyib.
Yazın, ay əziz, doğma, şair ruhlu, qəlbi uca Qazaxlılarım. Yazın, Talış yüksəkliyində Qəhrəmanlıq Dastanı yazan Mühüddən Qəhrəmanlıq Dastanı yazın. Talış yüksəkliyinin Azadlığı uğrunda can verən igid eloğlumuzu həqiqətin işığında, sözün diriliyində, qələmin nuru ilə yazın.
Azadlığa ürək verən Qəhrəmanın igidliyini Vətən Eşqilə yazın.
Səbinə Yusif
