Məlum olduğu kimi, noyabrın 20-də İordaniyada müxtəlif dövlətlərin silahlı qüvvələr və təhlükəsizlik orqanları arasında kibertəhlükəsizlik və tətbiqi kriptoqrafiya sahəsində “ARMYTHON” beynəlxalq kibertəhlükəsizlik müsabiqəsi keçirilib. Müsabiqədə iştirak edən Dövlət Təhlükəsizliyi Xidmətinin (DTX) Milli Kibertəhlükəsizlik Mərkəzinin “Land of Fire” komandası beynəlxalq rəqiblər arasında xüsusilə fərqlənərək 2-ci yerə layiq görülüb.
Kiberhücumlara qarşı alınmaz qala…
Avrasiya-Afrika regionunda ən nüfuzlu kibertəhlükəsizlik yarışması hesab olunan, 28 ölkədən 37 seçmə komandanın iştirak etdiyi “ARMYTHON” müsabiqəsində DTX-nın Milli Kibertəhlükəsizlik Mərkəzinin “Land of Fire” komandasının 2-c yer tutması sözügedən qurumun yüksək peşəkarlığından, müasir dünyanın dəyişən təhlükələrinə qarşı adekvat və sürətli reaksiyasından xəbər verir. “ARMYTHON” müsabiqəsinin nəticəsi sübut edir ki, DTX-nın tabeliyindəki bu mərkəz yüksək peşəkarlığa malik kadrlarla təmin edilib və Azərbaycana yönəlik kiberhücumları müvəffəqiyyətlə neytrallaşdırmağa, dövlətimizin bu müstəvidəki təhlükəsizliyini yüksək səviyyədə təmin etməyə qadirdir.
İordaniyada reallaşan “ARMYTHON” müsabiqəsinin nəticəsi həm də onu sübut etdi ki, DTX-nın peşəkarlığı, hazırlıq səviyyəsi sadəcə Cənubi Qafqaz regionunda deyil, bütün dünyada ən üst səviyyələrdədir və bu məsələdə hətta inkişaf etmiş ölkələrin böyük əksəriyyəti belə Azərbaycanın xüsusi xidmət orqanından əhəmiyyətli dərəcədə geri qalır.
Bu, sadəcə DTX deyil, Azərbaycan dövləti adına böyük uğurdur
DTX-nın Milli Kibertəhlükəsizlik Mərkəzinin “Land of Fire” komandasının İordaniyada əldə etdiyi bu qələbənin sadəcə xüsusi xidmət orqanımızın deyil, bütövlükdə dövlətimizin adına önəmli bir uğur, tarixi bir nailiyyətdir. Bu uğurun nə qədər böyük olduğunu anlamaq üçün Azərbaycan Respublikasının Prezidenti İlham Əliyevin Beynəlxalq Telekommunikasiya İttifaqının Ümumdünya Telekommunikasiyanın İnkişafı Konfransının iştirakçılarına müraciətinə nəzər salmaq kifayətdir. Dövlət başçısı məlum müraciətdə birmənalı şəkildə vurğulayır ki, “İnformasiya təhlükəsizliyi və kibertəhlükəsizlik strategiyası Azərbaycanın milli təhlükəsizlik arxitekturasının əsasını təşkil edir”.
Sitatdan da məlum olduğu kimi, Prezident İlham Əliyev kibertəhlükəsizlik strategiyasını dövlətimizin milli təhlükəsizlik arxitektursının nüvəsi kimi xarakterizə edir, bunun ölkəmiz üçün həyatı önəm kəsb etdiyini vurğulayır. Dövlət başçısının kibertəhlükəsizlik strategiyasına bunca önəm verməsinə səbəb isə müasir dünyamızda ən ciddi və təhlükəli təhdidlərin məhz kibercinayətkarlıqla bağlı olması, kiverhücumalardan qaynaqlanmasıdır. Məhz bu səbəbdən də Azərbaycan Respublikasının Prezidenti kibertəhlükəsizlik strategiyasına xüsusi önəm verir, dövlətimizin, əlaqədar dövlət qurumlarının bu sahədəki peşəkarlığının artırılmasını diqqət mərkəzində saxlayır.
DTX kibertəhlükəsizlik strategiyasının əsas icraçısı rolunda…
“ARMYTHON” müsabiqəsi və onun məlum nəticəsi onu deməyə əsas verir ki, DTX-nın peşəkarlığı, general Əli Nağıyevin rəhbərlik etdiyi kadrların hazırlıq səviyyəsi, habelə sözügedən qurumun maddi-texniki bazası istənilən kiberhücumu zərərsizləşdirməyə, dövlətimizin bu müstəvidəki təhlükəsizliyini də yüksək səviyyədə təmin etməyə imkan verir. Başqa sözlə desək, DTX bu gün dövlətimizin kibertəhlükəsizlik strategiyasının əsas icraçısı rolunda çıxış edir ki, bunu dövlət başçısının bu quruma, onun peşəkarlığına olan etimadı da təsdiqləyir.
Xatırladaq ki, bir neçə gün bundan öncə Prezident İlham Əliyev DTX-nın Mərkəzləşdirilmiş İnformasiya və Rəqəmsal Analitika Sisteminin (MİRAS) yaradılması ilə bağlı Fərman imzalayıb, bununla da DTX-nın informasiya təminatı və təhlil imkanları əhəmiyyətli dərəcədə artırılıb. MİRAS-ın məhz DTX-nin nəzdində yaradılması Prezidentimizin bu quruma olan inam və etimadından xəbər verir. Hansı ki, xüsusi xidmət orqanımız da bu etimadı hər addımda doğrultmaqdadır. DTX-nın İordaniyada bütün dünyaya verdiyi kibertəhlükəsizlik dərsi də bu böyük həqiqətin növbəti isbatıdır.
Seymur ƏLİYEV
