“Yeni Sabah” xəbər verir ki, tədbir həmçinin gənclərin bilik, təşəbbüs və yaradıcı yanaşma əsasında ictimai-siyasi proseslərə daha aktiv qoşulması üçün mühüm bir platforma kimi dəyərləndirilib.
Sədr Adəm İsmayıl Bakuvi çıxışında gənclərin müasir siyasətdə roluna xüsusi diqqət çəkib və onların ölkənin strateji inkişafına verdiyi töhfələrin əhəmiyyətini vurğulayıb: “Gənclər haqqında ‘gələcəyimizdir’ deyirik, amma həqiqət budur ki, onlar bu günümüzü dəyişdirən qüvvədir. Onların enerjisi və elmi düşüncəsi ölkəmizi irəli aparan əsas mexanizmdir”.
Sədr Adəm İsmayıl Bakuvi bildirib ki, Vəhdət Partiyası gənclərlə birgə yeni intellektual mühit yaratmağı və hər bir gəncin fikir, təşəbbüs və analitik bacarıqlarını inkişaf etdirməsi üçün geniş imkanlar açmağı planlaşdırır.
Partiyanın Aparat rəhbəri Əbdülvahab Manafov bölgələrdə gənclər üçün görülən işlərdən danışıb. O vurğulayıb ki, hazırda region gəncləri üçün maarifləndirici təlimlər, sosial layihələr və ictimai təşəbbüslərə dəstək mexanizmləri üzərində işlənilir. Gənclər Təşkilatının sədri Aynurə Ələkbərova isə yeni təşəbbüsləri təqdim edərək, elmi debatların, ekspertlərlə görüşlərin və analitik müzakirələrin yaxın aylarda aktiv fazaya keçəcəyini bildirib.
Gənc idmançı Zeynəb İbrahimova, karate məşqçisi İlqar Abdullazadə, gimnast Məryəm İbrahimova, həkim-cərrah Rəşad Quliyev çıxış edərək gənclər üçün yaradılan imkanlara görə təşəkkürlərini bildiriblər. Onlar bu addımların onların peşə bacarıqlarının inkişafına, ictimai uğurlarına və özünəinamın güclənməsinə ciddi töhfə verdiyini qeyd ediblər. Gənclər toplantıların yalnız bir informasiya mübadiləsi yox, həm də motivasiya və dəstək mənbəyi olduğunu xüsusi vurğulayıblar.
Yazar Kamran Orucov və alim Mətanət Xudiyeva milli kimlik, mədəni irs və maarifçilik mövzularına toxunaraq gənclərin bu proseslərdə aparıcı rolunu vurğulayıblar. Onlar bildiriblər ki, gənclərin həm elmi, həm də mədəni mühitdə aktivliyi cəmiyyətin ideoloji dayanıqlığı və milli yaddaşın möhkəmlənməsi üçün mühüm faktordur.
Sonda Adəm İsmayıl Bakuvi tədbirin kulminasiya anı kimi Vəhdət Partiyası nəzdində “Elmi Gənclər Klubu”nun yaradıldığını rəsmi elan edib. Bu klubun gənclərin intellektual inkişafına, onların analitik bacarıqlarının gücləndirilməsinə və elmi mühitə inteqrasiyasına xidmət edəcəyi bildirilib.
