“Bu gün daşınmaz əmlak bazarında bir sıra mənzillərin şişirdilmiş qiymətlərlə satışa çıxarılması müşahidə olunur”. Bu sözləri İqtisadiyyat.az-a açıqlamasında daşınmaz əmlak məsələləri üzrə ekspert Ramil Qasımzadə deyib.
Onun sözlərinə görə, bu prosesə həm relitorlar təsir göstərir, həm də vətəndaşlar özləri mənzillərin bahalaşacağı təhlükəsindən ehtiyatlanaraq onu baha qiymətə təklif edirlər: “Bazarda bu tendensiya görünür. Yəni hər ilin sonuna doğru gələn il sanki bazarda sıçrayışlı artım olacağı qorxusundan irəli gələrək qiymətlər artırılır”.
Ekspert misal olaraq söyləyib ki, bəzi vətəndaşlar evlərini satıb yeni mənzil almaq və ya dəyişmək istədikdə, bəzən ehtiyatlanma olurlar: “Əgər mənzilin qiyməti 200 min manatdırsa, ortalama 240 və ya 250 min manata təkliflər edilir. Həmin mənzillər aylarla qalsa da, satılmır, real dəyərə uyğun olduqda satılır”.
R.Qasımzadə bildirib ki, bu gün bazarda bir kvadratmetr üçün orta qiymət 2500 manat ətrafındadır və yerdən asılı olaraq qiymətlər dəyişir.
Onun sözlərinə görə, bu gün Bakı şəhərində 1 kvadrat metri 1400 manatdan başlayaraq 8000 manata qədər olan mənzillər var: “Təbii ki, 8000 manata olan mənzillər mərkəzdə yerləşən və lüks seqmentə aid olanlardır. Amma orta bazarın qiyməti 2200 manatdan 3500 manat aralığına qədərdir. Bu qiymətdən yuxarı olanlar seqment baxımdan üstündür, yəni lüks mənzillərdir, onların satışı bir qədər azdır və bazarda onların payı elə də çox deyil”.
Ramil Qasımzadə deyib ki, bazarda əsas paya malik orta sinfə aid olan mənzillərdir: “Yəni orta kateqoriya dedikdə biz qiyməti 150 min manatdan 350 min manata qədər olan mənzilləri nəzərdə tuturuq. 150 min manata qədər olanlar isə demək olar ki, köhnə tikili mənzillərdir və yaxud kvadratı az olan yeni tikililərdir ki, onların da satışı likviddir, daha tez satılır”.
Ekspert bazarda tələbatın yüksək olduğunu da diqqətə çatdırıb: “Biz özümüz də işimizlə bağlı olaraq o tələbatı görürük. Real qiymətə təklif olunan mənzilin satış müddəti 15 gündən artıq keçmir. Yəni 150 min manata qədər olan mənzillərin alıcıları daha tez tapılır, nəinki digərləri. Bunlar likvid mənzillərdir. Bunların qiymətində maksimum 10% fərq yaranır. Dərhal alınıb satıla bilər”.
