Xəbər verdiyimiz kimi, bu gün Ukrayna Milli Antikorrupsiya Bürosunun və Xüsusi Antikorrupsiya Prokurorluğunun əməkdaşları ölkənin Prezident Administrasiyasının rəhbəri Andrey Yermakın evində axtarış aparıblar. Bu əməliyyatın ilk növbədə enerji sektorunda korrupsiya şübhələri ilə bağlı olduğu bildirilir.
Siyasi şərhçi Məhəmməd Əsədullazadə isə məsələ ilə bağlı Medianews.az-a açıqlamasında deyib ki, Milli Antikorrupsiya Bürosu ABŞ-ın nəzarətində olan bir qurumdur və faktiki Ukraynanın siyasi rəhbərliyinə tabe deyil: “Belə bir qurumun Andrey Yermakı hədəfə alması təsadüf sayıla bilməz”.
M.Əsədullazadənin sözlərinə görə, A.Yermak ABŞ Prezidenti Donald Trampın Rusiya-Ukrayna müharibəsi ilə əlaqədar irəli sürdüyü, daha çox Moskvanın mənafeyinə xidmət edən 28 maddəlik “sülh planı”na qarşıdır: “Həmin planın müzakirə və rədd olunduğu Cenevrə danışıqlarına Yermak rəhbərlik edib. Yermak Ukraynada kifayət qədər güclü fiqurdur, Prezident Volodimir Zelenskinin çox yaxın müttəfiqidir. Yermakın hədəfə gətirilməsi Zelenskiyə təzyiq göstərərək Trampın təkliflərini qəbul etdirməyə hesablanıb”.
Politoloq qeyd edib ki, bəli, Ukraynada korrupsiyanın olduğu danılmazdır, amma indi bu əməliyyatların arxasında siyasi motiv – Zelenskinin hakimiyyətini laxlatmaq, onu ya Rusiyanın maraqlarına xidmət edən planla razılaşmaq, ya da istefaya getməyə məcbur etmək cəhdi dayanır: “Amma Avropa İttifaqı Zelenskiyə ciddi siyasi dəstək verəcək. Onu ABŞ-ın təzyiqlərindən qorumağa çalışacaq”.
Medianews.az
