“Lukoil”in Ukrayna müharibəsinin niyə əleyhinə olduğunu Rusiyada indi anlamağa başlayıblar
Azərbaycanəsilli oliqarx Vahid Ələkbərovun əsas səhmlərinə sahib olduğu “Lukoil”in düşdüyü vəziyyət bütün dünyada ciddi müzakirə mövzularından biridir.
Rusiya prezidenti Vladimir Putin noyabrın 27-də Bişkekdə keçirdiyi mətbuat konfransında “Lukoil” və “Rosneft” şirkətlərinə qarşı niyə sanksiyalar tətbiq etdiyini başa düşmədiyini bildirib. “Bu məsələlərdə Rusiya ilə ABŞ arasında heç bir münaqişə yaranmayıb. Amma birdən ABŞ iki neft şirkətimizə qarşı sanksiyalar elan etdi. Bunun səbəbi nə idi? Düzünü deyirəm, nə baş verdiyini belə başa düşmədim” deyə, Putin sual edib. Putinin indi “başa düşmədiyini” hələ 2022-ci ilin martında Vahid Ələkbərov yaxşı anlamış, Rusiyanı və şirkətləri gözləyən təhlükə barədə açıq xəbərdarlıq da etmişdi.
Xəbər verildiyi kimi, ABŞ Maliyyə Nazirliyinin Xarici Aktivlərə Nəzarət İdarəsi (OFAC) alıcı tapsa belə, “Lukoil”un xarici aktivləri üçün pul almasına icazə verməyəcək, satışdan əldə olunan gəlirlər neft şirkətinə qarşı sanksiyalar tam aradan qaldırılana qədər dondurulacaq. Açıqlamada deyilir ki, OFAC-ın razılığı olmadan heç bir alqı-satqı əməliyyatı bağlana bilməz. OFAC bəyan edib ki, istənilən vaxt “Lukoil” aktivlərinin satışının təxirə salınmasını ləğv etmək hüququnu özündə saxlayır.
Vahid Ələkbərov Rusiya şirkətlərinin, eləcə də “Lukoil”un belə bir aqibətlə üzləşəcəyini Putin Ukraynada hərbi əməliyyatlara başlayandan bir neçə gün sonra demişdi.
Məhz ilk və son şirkət olaraq “Lukoil”un Direktorlar Şurası Ukraynada hərbi əməliyyatlara son qoymağa çağıran bəyanat yaymışdı. Rusiyanın ən böyük özəl neft şirkəti olan “Lukoil”rəhbərliyi Ukraynadakı vəziyyətin danışıqlar yolu ilə həllinə və hərbi əməliyyatlara son qoymağa çağırırdı.
Bu bəyanat Rusiyada şok effekti yaratdı, Kremlə yaxın muzdlu ekspertlər dərhal azərbaycanlı biznesmeni hədəfə aldılar. Onlar açıq deyirdilər ki, V.Ələkbərov “Lukoil”dan qazancını düşünərək, yeni sanksiyalara məruz qalmaqdan qorxduğu üçün bu müraciətin hazırlanmasını təşkil edib.
Məsələn, Rusiya Federasiyası Hökuməti yanında Maliyyə Universitetinin siyasi elmlər kafedrasının müəllimi Leonid Krutakov hesab edirdi ki, bu cür çağırışlar “nəinki dəhşətli dərəcədə yanlışdır, həm də Rusiyanın maraqlarına açıq şəkildə ziddir”.
İqtisadçı Nikita Kriçevski hətta V.Ələkbərovu hədəf alaraq ““dünya sülhü”ndən narahat olsaydı, Qarabağ müharibəsi zamanı da oxşar çağırışlar edərdi” deyib. Bu cür düşünənlər çox idi və onlar hesab edirdilər ki, çağırışın kökündə şəxsi maraqlar və həm Amerika, həm də Avropa bizneslərini qoruyub saxlamaq, sanksiyalardan yayınmaq istəyi dayanır. “Komsomolskaya Pravda” isə yazırdı ki, Ələkbərov guya ölkəni tərk edib və bir daha qayıtmaya da bilər…
V.Ələkbərov Rusiyadadır. Onun dedikləri isə doğruldu, bu müharibə təkcə oliqarxları milyardlarla ziyana salmadı, həm də Rusiyaya ölçüyəgəlməz zərər vurdu və vurmaqda da davam edir…
