Məlum olduğu kimi, ABŞ Prezidenti Donald Tramp müttəfiqlərini tənqid edərək dəfələrlə ölkəni NATO-dan çıxarmaqla hədələyib. Trampın tələblərinə uyğun olaraq, bu yay ittifaq ölkələri 2035-ci ilə qədər müdafiə xərclərini ÜDM-in 5%-nə çatdırmağı öhdələrinə götürüblər.
Buna baxmayaraq, ABŞ-dəki qatı Tramp tərəfdarları ölkənin NATO-nu tərk etməsi məsəlsəini Konqres səviyyəsinə qaldırıblar.
“AzPolitika” xarici KİV-ə istinadla xəbər verir ki, ABŞ-nin Kentukki ştatından olan respublikaçı konqresmen Tomas Massi ABŞ-nin NATO-dan çıxmasını nəzərdə tutan qanun layihəsini Konqresə təqdim edib.
Konqresmenin “Etibarlı Olmayan Təşkilat Haqqında Qanun” (NATO Qanunu) adlandırdığı sənədə görə, ABŞ təşkilatı tərk etməlidir.
“NATO Soyuq Müharibənin qalığıdır. Biz NATO-dan çıxmalı və bu pulu sosialist dövlətləri deyil, öz ölkəmizi müdafiə etmək üçün istifadə etməliyik. NATO 30 ildən çox əvvəl dağılan Sovet İttifaqına qarşı durmaq üçün yaradılıb. O vaxtdan bəri ABŞ-nin bu təşkilatda iştirakı vergi ödəyicilərinə trilyonlarla dollara başa gəlib və bu, ABŞ-nin xarici müharibələrdə iştirakı riskini daşımaqda davam edir”, – deyə Massi bildirib.
Konqresmenin sözlərinə görə, ABŞ Konstitusiyası xarici işlərə daimi müdaxiləyə icazə vermir və Vaşinqton “bütün dünyanın, xüsusən də varlı ölkələrin təhlükəsizliyini təmin etməməlidir”.
Təşəbbüsdə bildirilir ki, NATO üzvlüyü ABŞ-nin milli təhlükəsizlik maraqlarına uyğun deyil. Qanun layihəsi ABŞ Prezidentindən Şimali Atlantika Müqaviləsinin 13-cü maddəsinə uyğun olaraq, qanunun qüvvəyə minməsindən sonra 30 gündən gec olmayaraq NATO-ya ölkənin təşkilatdan çıxması barədə məlumat verməsini tələb edir.
Bu arada “Reuters”-in məlumatına görə, ABŞ Avropa ölkələrindən 2027-ci ilə qədər raket istehsalı və kəşfiyyat məlumatlarının toplanması da daxil olmaqla, NATO-nun müdafiə xərclərinin əksəriyyətini öz üzərinə götürmələrini tələb edib. Ağ Ev son tarixə qədər buna nail olunmazsa, ABŞ-nin bəzi NATO müdafiə mexanizmlərində iştirakını azaltmaqla hədələyib.
Xatırladaq ki, Trampın sələfi Co Baydenin dövründə Konqres ABŞ prezidentlərinin NATO-dan çıxmasını qadağan edən qanun layihəsini qəbul edib. Həmin qanunun təşəbbüskarlarından biri də hazırkı Dövlət katibi Marko Rubio olub.
C.Məmmədli
“AzPolitika.info”
