Qərbin qapısı kimi tanınan, sazın, sözün beşiyi sayılan Qazax eli həm də tarixi şəxsiyyətləri, Xalq şairləri, yazıçıları, aşıq, ozan sənətinin nəhəngləri ilə səs salıb bütün aləmə. Bu diyarda sözə verilən qiymət, saza olan hörmət hər zaman yüksək səviyyədə olub. Söz, sənət mülkünün beşiyi sayılan Qazaxda şairlərimizin, yazarlarımızın doğum və anım günləri də heç zaman unudulmur. Rəhbər təyin olunduğu ilk gündən bu sahəni daim diqqət mərkəzində saxlayan rayon rəhbərliyi öz ənənəsini bu gün də davam etdirir.
Dekabrın 17-də Xalq şairi Osman Sarıvəllinin (Osman Abdulla oğlu Qurbanov) doğum günündə məzarı başında yad edilməsi şairlərimizə olan ehtiramın bariz nümunəsidir.
Qazax Rayon İcra Hakimiyyəti və Azərbaycan Yazıçılar Birliyi Qazax bölməsinin birgə təşkilatçılığı ilə Xalq şairi Osman Sarıvəllinin anadan olmasının 120 illiyi münasibətilə İkinci Şıxlı kəndində şairin məzarı başında keçirilən “Poeziya saatı”nda Osman Sarıvəlli sözünə, şeiriyyətinə, poeziyasına, şəxsiyyətinə dəyər, qiymət verənlər onun yaradıcılığından söhbət açıb, ünvanına səmimi ürək sözlərini səsləndiriblər.
Tədbirdə Qazax Rayon İcra Hakimiyyətinin başçısı Rəcəb Babaşov, icra aparatının məsul əməkdaşları, “QAZAX” Xeyriyyə İctimai Birliyinin üzvləri, Azərbaycan Yazıçılar Birliyi Qazax bölməsinin sədri, Əməkdar incəsənət xadimi, şair Barat Vüsal, Bölmənin üzvləri, mədəniyyət işçiləri, İkinci Şıxlı kəndinin ziyalıları, şairin yaxın qohumları, KİV nümayəndələri iştirak ediblər.
Əvvəlcə şairin və onunla birgə eyni qəbiristanlıqda uyuyan övladlarının məzarı üstünə tər qərənfillər düzülüb, əziz xatirələri ehtiramla anılıb.
Tədbirdə Ümummilli Lider Heydər Əliyevin, respublikamızın ərazi bütövlüyü, ölkəmizin suverenliyi uğrunda canlarını fəda etmiş şəhidlərin, igid Vətən oğullarının əziz xatirəsi birdəqiqəlik sükutla yad edilib.
Tədbirin aparıcısı, Azərbaycan Yazıçılar Birliyi Qazax bölməsinin sədri, Əməkdar incəsənət xadimi, şair Barat Vüsal çıxış edərək tədbirə toplaşanları salamlayıb, bu günün əhəmiyyətindən söz açıb. İlk növbədə şairlərə, saz, söz adamlarına göstərilən diqqətə, qayğıya, hörmət və ehtirama görə ölkə Prezidenti İlham Əliyevə, mədəniyyətimizin, poeziyamızın hamisi olan Birinci vitse-prezident Mehriban xanım Əliyevaya minnətdarlığını bildirib. “Bugünkü tədbir bir daha onu göstərir ki, Qazaxda milli dəyərlərə çox böyük diqqət göstərilir, böyük ehtiram var. Bugünkü tədbirin keçirilməsi Osman Sarıvəllinin timsalında bütün yazarlara verilən dəyərdir”, – söyləyən şair ölkə rəhbərinin ziyalılara olan qayğısının Qazaxda olduğu kimi icra edildiyini, rayon rəhbərliyinin fəaliyyətə başladığı ilk gündən ziyalılara olan hörmətin, səmimi münasibətin şahidi olduğunu dilə gətirib. Bugünkü tədbirin təşkil olunmasına görə Qazax Rayon İcra Hakimiyyətinin başçısı Rəcəb Babaşova ziyalılar və öz adından təşəkkürünü bildirib. Şairin həyat və yaradıcılığı barədə tədbir iştirakçılarına ətraflı məlumat verən B.Vüsal qeyd edib ki, Osman Sarıvəlli 1905-ci il dekabrın 17-də Qazax rayonunun İkinci Şıxlı (Sarıvəlli) kəndində anadan olmuşdur. Orta təhsilini Qazax Müəllimlər Seminariyasında aldıqdan sonra bir müddət Göyçay rayonunun Qaraməryəm və Bığır kənd məktəblərində müəllim işləmişdir (1926–1929). Təhsilini artırmaq məqsədilə Moskvaya getmiş və burada Dövlət Universitetinin filologiya fakültəsində oxumuşdur (1929–1932). 1937-ci ildə Azərbaycan Yazıçılar İttifaqına üzv olmuşdur. Bakı Pedaqoji texnikumunda müəllim (1932–1935), Bakı Teatr texnikumunda müdir (1939–1940), Azərbaycan EA Nizami adına Dil və Ədəbiyyat İnstitutunda müdir müavini, “Ədəbiyyat qəzeti”nin redaktoru, Uşaqgəncnəşrdə redaktor, Azərbaycan Yazıçılar İttifaqında şeir üzrə məsləhətçi vəzifələrində işləmişdir. 1990-cı il iyulun 2-də Bakıda vəfat etmiş və doğulduğu İkinci Şıxlı kəndində dəfn edilmişdir. Bildirib ki, Osman Sarıvəlli ədəbi yaradıcılığına 1933-cü ildə başlamışdır. Həmin ildə “Gənc işçi” qəzetində “Ayaqsız” adlı ilk şeiri çap olunmuşdur. Osman Sarıvəllinin “Dəmir sətirlərim” adlanan birinci kitabı 1934-cü ildə çap olunmuşdur. Şairin təltif və mükafatlarını qeyd edən B.Vüsal söyləyib ki, O.Sarıvəlli “Azərbaycan SSR xalq şairi” fəxri adına, “Oktyabr inqilabı”, “Qırmızı əmək bayrağı”, “Xalqlar Dostluğu”, “Şərəf nişanı” ordenlərinə, “Əməkdə fərqlənməyə görə” medalına layiq görülmüşdür. B.Vüsal Xalq şairinin “Dəmir sətirlərim”, “Bənövşə”, “Şairin hədiyyəsi”, “Gətir, oğlum, gətir”, “Gənclik eşqi”, “Bahar çiçəkləri”, “Yeni dünyanın qapısı”, “İqlimdən-iqlimə”, “Sabahı yaradanlar”, “Seçilmiş əsərləri” (üç cilddə), “Hər kim yüz il yaşamasa”, “Mən sabaha gedirəm”, “Kür qırağında”, “Sarıvəlli O.Aşıq ürəkli şair, şair ürəkli Aşıq Şəmşir”, “Sarıvəlli O.Qüdrətli şair, ustad sənətkar” adlı kitabların müəllifi olduğunu diqqətə çatdırıb. Xalq şairi Osman Sarıvəlli haqqında ürək sözlərini qeyd edən B.Vüsal 1990-cı ilin 3 iyulunda haqq dünyasına qovuşan böyük şairin illər ötsə də hər zaman ehtiramla anıldığını, əziz xatirəsinin daim qəlblərdə yaşadığını bildirib. Xalq şairinin haqqında məqalələr yazıldığını, kitablar nəşr olunduğunu, əziz xatirəsinə şeirlər həsr edildiyini diqqətə çatdırıb. B.Vüsal Osman Sarıvəllinin hər zaman xalqının yaddaşında yaşayan, əsərləri ilə xalqının başını uca edən, xalqın iftixarı olan şairlərimizdən olduğunu bildirib. Osman Sarıvəlli poeziyasının ölməz poeziya olduğunu qeyd edən şair gənc yazarların bu gün də həmin poeziyadan bəhrələndiyini qeyd edib. Azərbaycan poeziyasında yeni mərhələnin açılmasında Osman Sarıvəllinin danılmaz xidmətləri olduğunu söyləyib. Azərbaycanın, doğma Qazaxın adını, şərəfini, şöhrətini öz əsərləri ilə hər zaman uca tutduğunu, yaşatdığını qeyd edib.
Qazax Rayon İcra Hakimiyyətinin başçısı Rəcəb Babaşov çıxış edərək tədbir iştirakçılarını salamlayıb, səmimi ürək sözlərini bölüşüb. Ölkə Prezidenti İlham Əliyevin və Birinci vitse-prezident Mehriban xanım Əliyevanın saz-söz adamlarına, yazarlara, şairlərə, ziyalılara verdikləri dəyərdən, göstərdikləri diqqət və qayğıdan söz açan icra başçısı həmin qayğının Qazaxda yüksək səviyyədə hiss olunduğunu, ölkə başçısının Sərəncamı ilə tikilən və istifadəyə verilən Ədəbiyyat Muzeyini bunun bariz nümunəsi kimi göstərib. Fəaliyyətə başladığı ilk gündən bu amili hər zaman nümunə və örnək götürərək ziyalı kəlməsinə, ziyalı sözünə yüksək qiymət verdiyini vurğulayıb. Rayon rəhbəri sazın, sözün beşiyi sayılan, bütün döyüşlərdə igidlikləri ilə tarix yazan qəhrəman oğulların diyarı olan Qazaxda bu cür tədbirlərin keçirilməsinin artıq bir ənənə halını aldığını qeyd edib. Xalq şairi Osman Sarıvəlli və onun yaxın dostu Xalq şairi Səməd Vurğun haqqında ürək sözlərini, onlarla bağlı xatirələrini bölüşən icra başçısı hər iki şairimizin xalqımızın və doğma qazaxlıların qəlbində əbədi yaşadıqlarını vurğulayıb. “Nə yaxşı ki, Osman Sarıvəlli, Səməd Vurğun, İsmayıl Şıxlı və onlar kimi fəxr olunacaq yüzlərlə ziyalılarımız, yazarlarımız var. Qazaxlılar olaraq adlarını Azərbaycan ədəbiyyatına yazdıran bu cür ziyalılarımızla hər zaman fəxr edirik”, – deyən icra başçısı onların əziz xatirələrinin yad olunduqca, anıldıqca ruhlarının şad olduğunu bildirib. Bugünkü tədbirin təşkil olunmasının da məhz bu məqsədə xidmət etdiyini söyləyib. Osman Sarıvəlli ocağından pərvazlanan, atasının adını daim uca tutan Prof. Dr. Babək Qurbanovun həyat və fəaliyyətindən söz açan icra başçısı ata kimi oğulun da öz adını tarixə yazdığını qeyd edib. Bildirib ki, Osmanoğlu Babək Qurbanov xoşməramlı, xeyirxah niyyəti ilə xatirələrdə bu gün də yaşamaqdadır. Həyatda ikən hörmət-ehtiram sahibi olan, zəhməti, çalışqanlığı ilə hər kəsə nümunə, örnək olan Osmanoğlu yadigarı Babək Qurbanov bu gün də anılmaqdadır. Uzun müddət qardaş Türkiyədə yaşasa da insanlıq naminə vicdanla, qeyrətlə ana Vətənimiz Azərbaycan adına layiq ülvi xidmətlərlə, elmi nailiyyətlərlə xalqının, ölkəsinin adını daim uca tutdu. Atasının adına layiq şəkildə yaşadı və daim Osmanoğlu adını yaşatdı. Babək Qurbanovun bu gün də unudulmadığını, yaxın dostu, uzun müddət bir yerdə çiyin-çiyinə çalışmış Sənətşünaslıq Elmləri Doktoru, Qaziantep Universiteti Türk Musiqisi Dövlət Konservatoriyasının professoru, Türk Xalq Musiqisinə Xidmət mükafatçısı İlqar Cəmiloğlu İmamverdiyevin Babək Qurbanovu hər zaman yad etdiyini, onun əziz ruhunu şad etdiyini diqqətə çatdırıb.
Azərbaycan Yazıçılar Birliyinin üzvləri olan şairlərdən Səhlədar Hidayətoğlu, Rüfət Axundlu, Kazım Kazımlı, Əvəz Sofuoğlu, Yasin Cavan, Tamella Poladlı, Gülsənəm Cəlilli, Elnur Süleymanlı, Bilal Qoca, Arif Musazadə, İkinci Şıxlı kənd sakni Abbas Cürənov çıxış edərək Xalq şairi Osman Sarıvəlli haqqında fikirlərini bölüşüb, keçirilən tədbirin əhəmiyyətindən söz açıblar. Xalq şairinə həsr olunmuş, eləcə də özünün vaxtilə qələmə aldığı şeirləri səsləndiriblər. Çıxış edənlər Qazaxda ziyalılara, şairlərə verdiyi dəyərə görə rayon rəhbərliyinə minnətdarlıqlarını bildirib, bugünkü tədbiri təşkil edənlərə razılıqlarını ifadə ediblər.
Aşıq Saqif Məzəmli Xalq şairinin şeirini saz havası üstə təqdim edərək əziz xatirəsini ehtiramla anıb.
