Hər kəs özünə cavabdehdir, yalnız və yalnız özünə!
Son günlərin ən çox müzakirə edilən məsələlərindən biri siqaret qaçaqmalçılığı ilə bağlı aparılan istintaq çərçivəsində həbs edilən Bakı–Hövsan Beynəlxalq Ticarət Dəniz Limanının faktiki rəhbəri Ruslan Eyyubovun həbsidir. Xatırladaq ki, Baş Prokuror yanında Korrupsiyaya qarşı Mübarizə Baş İdarəsi tərəfindən saxlanılan Ruslan Eyyubov haqqında məhkəmə qərarı ilə 2 aylıq həbs qətimkan tədbiri seçilib, bu barədə ictimaiyyətə ilkin informasiya təqdim olunub. Şübhəsiz, istintaq prosesinin gedişatı ilə bağlı yaxın günlərdə də rəsmi qurumlar media və ictimaiyyəti məlumatlandırmaqda davam edəcək.
Bu əsnada media və sosial mediada diqqət çəkən məqamlardan biri də Ruslan Eyyubovla bağlı baş verənlər fonunda Prezidentin şəxsi mühafizə xidmətinin keçmiş rəhbəri Bəylər Eyyubovun da isminin hallandırılması, onun da hədəf seçilməsidir. Halbuki, Ruslan Eyyubovla bağlı baş verənlərin Bəylər Eyyubovla bu və ya digər dərəcədə bağlı olması ilə bağlı heç bir rəsmi məlumat yoxdur. Bununla bağlı hüquq-mühafizə orqanları tərəfindən hər hansı açıqlama verilməyib və praktiki addım atılmayıb.
Onu da unutmaq olmaz ki, Azərbaycan qanunvericiliyinə görə hər kəs yalnız və yalnız özünə cavabdehdir və heç kim ən yaxın ailə üzvünün belə yol verdiyi qanunsuzluğa görə məsuliyyət daşımır.Belə olan halda bəzi media orqanlarının Bəylər Eyyubovu potensial hədəf kimi təqdim etməsi, Ruslan Eyyubovla bağlı olaya onu da daxil etməsi məntiqdsiz və bir o qədər də qeyri-etikdir.
Bəli, bu ölkədə heç kim, eyni zamanda Bəylər Eyyubov da qanundan üstün deyil və bundan sonra da olmayacaq. Lakin bu həqiqəti yeri gəldi-gəlmədi səsləndirərək günahsız insanları ictimai qınaq obyektinə çevirmək, onlarla bağlı qarayaxma kampaniyası aparmaq əxlaqi-mədəni baxımdan yolverlməzdir. Unutmaq olmaz ki, Bəylər Eyyubov bütün şüurlu ömrünü Azərbaycan dövlətinin və dövlətçiliyinə həsr edən, Ulu Öndər Heydər Əıliyev və Prezident İlham Əliyevə sədaqəti ilə diqqət çəkən azsaylı şəxslərdən biri olub. Belə olan halda onun subyektiv fikir və qənaətlərə əsaslanaraq hədəfə alınması doğru bir davranış sayıla bilməz. Bu cür davranış eyniylə Bəylər Eyyubov kimi bütün ömrünü Azərbaycanın inkişafına xidmət edən digər şəxslərdə də ruh düşgünlüyünün yaranmasına, onların mediaya olan inamının sarsılmasına səbəb ola bilər.
Ümid edək ki, heç deyilsə bundan sonra media nümayəndələri və sosial media istfadəçiləri bu kimi məsələlərə daha həssas yanaşacaq, heç kimi öz qərəz və ya öncəgörmələrinə qurban etməyəcək.
Seymur ƏLİYEV
