Bu il Həcc ziyarətinə getmək istəyən azərbaycanlı zəvvarlar üçün təxminən 1200-1300 yer ayrılıb.
Cumhuriyyet.az xəbər verir ki, bu barədə Teleqraf-a açıqlamasında QMİ-nin Xarici əlaqələr şöbəsinin müdiri, Həcc Elektron Sisteminin rəhbəri Vüsal Cahangiri deyib.
Onun sözlərinə görə, hələlik kvotanın tam həcmi təyin olunmayıb, amma yerlərin artıq 70-75 faizi dolub:
“Həccə niyyəti olan vətəndaşlarımızdan xahiş edirik ki, gec qalmasınlar, yerlər məhduddur. Bir nəfər üçün ziyarət paketinin qiyməti 5950 ABŞ dolları təşkil edir. Hazırda ziyarətə getmək istəyənlərin müraciətləri qəbul olunur. Ziyarət vahid formada təşkil olunacaq və hava nəqliyyatı ilə həyata keçiriləcək”.
O bildirib ki, ziyarətə gedənlərin sənədlərinin qəbulu yanvarın 21-dən başlayıb və iş günləri ərzində saat 10:00-dan 16:00-a kimi Qafqaz Müsəlmanları İdarəsinin Bakı şəhəri, Mirzə Fətəli küçəsi 7 ünvanında yerləşən inzibati binasında aparılır.
Xatırladaq ki, ötən il Həcc ziyarət üzrə Azərbaycana 1500 yer ayrılmışdı.
