Beyləqan Rayon İcra Hakimiyyətinin təşkilatçılığı ilə cari ilin 18 mart tarixində rayon stadionunda Novruz şənliyi keçirilib. Bununla bağlı icra hakimiyyətinin rəsmi saytında yer alan fotolardan da görünür ki, şənlik əsnasında xoruz döyüşü keçirilib, icra başçısı və digər rayon yetkililər maraqla bu səhnəni seyr edib. (https://beyleqan-ih.gov.az/az/news/beyleqanda-novruz-bayrami-boyuk-cosgu-ile-kecirildi.html ). Xoruz döyüşü ilə bağlı fotodan da görünür ki, hətta icra başçısının yanındakı şəxslərdən ikisi bu döyüşü böyük maraq və məmnunluqla mobil telefonla çəkir.
İcra başçısının bayram günü xoruz döyüşünə tamaşa etməsi ilk baxışdan epizotik bir olay kimi görünsə də, əslində baş verənlərin ciddi qanun pozuntusu olması ehtimalı var. Cumhuriyyet.az olaraq bildirək ki, Beyləqan Rayon İcra Hakimiyyətinin təşkil etdiyi xoruz döyüşü “Heyvanlar aləmi haqqında”, “Ətraf mühitin mühafizəsi haqqında” və “Yaşıllıqların mühafizəsi haqqında” Azərbaycan Respublikasının qanunlarına 29 dekabr 2024-cü il tarixində edilən dəyişiliyin tələblərini ilə ziddiyyət təşkil edir. Belə ki, məlum qanun layihəsinin 1-ci maddəsinin tələblərini pozur. Çünki qanunda açıq şəkildə qeyd edilib ki, “heyvanlarla rəhmsiz rəftar
etdikdə, yəni onlara ağrı, əzab, işgəncə verilməsi, onların döyülməsi və döyüşdürülməsi nəticəsində onları şikəst və ya tələf etdikdə, rəhmsiz rəftarı nümayişkaranə şəkildə, o cümlədən mediada nümayiş etdirilməklə törətdikdə, belə rəftarı təbliğ etdikdə və ya belə rəftara açıq çağırışlar etdikdə və bu cür rəftarı özündə əks etdirən materialları kommersiya məqsədləri üçün istifadə etdikdə;” buna yol verən şəxslər məsuliyyətə cəlb olunur.
(https://president.az/az/articles/view/67809 ). Bu isə o deməkdir ki, Əziz Əzizov həm xoruz döyüşnn təşkilatçısı, həm iştirakçısı, həm də bunun mediada təbliğatçısı kimi məsuliyyətə cəlb edilə bilər. istənilən halda bu olayın aiddiyyatı qurumlar tərəfindən araşdırılmasına və hüquqi qiymət verilməsinə ciddi ehtiyac var.
