Son bir il ərzində Azərbaycanda 22 aptek təşkilatı reseptsiz dərman satışına görə cərimələnib.
Cumhuriyyet.az xəbər verir ki, bu barədə Səhiyyə Nazirliyi Analitik Ekspertiza Mərkəzindən məlumat verilib.
Bildirilib ki, İnzibati Xətalar Məcəlləsinin 452.1-ci maddəsinə əsasən apteklərdə resept təqdim edilməklə buraxılmalı olan dərman vasitələrinin reseptsiz buraxılmasına və ya yetkinlik yaşına çatmayanlara dərman vasitələrinin buraxılması qaydalarının pozulmasına görə yüz əlli manatdan iki yüz əlli manatadək məbləğdə cərimə edilir. Keçirilən təftişlər zamanı son 1 il ərzində ümumilikdə 22 aptek təşkilatı bu inzibati xətaya görə cərimələnib.
Ötən il yanvarın 1-dən etibarən ölkə ərazisində “Elektron Resept” sisteminə keçid başlanılıb. Elektron reseptin üstünlüklərindən biri sistem üzərindən xəstəyə dərman vasitəsi təyin olunmamışdan öncə diaqnozun təyin olunmasıdır.
Mərkəzin keçirdiyi yoxlamalar zamanı mediada yayılan informasiyalar əsasında, vətəndaş müraciətləri, digər dövlət qurumlarından gələn müraciətlərin dəyərləndirilməsinin nəticələrinə uyğun olaraq bu və ya buna oxşar hallar müşahidə edildikdə aptek təşkilatının sahibi qanunla məsuliyyətə cəlb edilir.
Azərbaycanda dövlət qeydiyyatına alınan bütün növ antibiotik tərkibli dərman vasitələri içlik vərəqəsində yazılan buraxılma qaydasına müvafiq olaraq aptek təşkilatlarından buraxılmalıdır. Bu il ərzində bugünə kimi aptek təşkilatlarından reseptsiz buraxılışına icazə verilən antibiotik tərkibli dərman vasitəsi qeydə alınmayıb. Yəni antibiotik reseptsiz satıla bilməz.
“Antibiotiklər həkim resepti əsasında və müalicə həkimin nəzarəti altında istifadə edilməlidir. Hər antibiotik istifadəsindən qabaq həssaslıq yoxlanılmalıdır. Hətta eyni antibiotik istifadəsinin hər yeni kurs müalicəsindən qabaq da həssaslıq yoxlanılmalıdır. Bəzi antibiotiklərin istifadəsi zamanı çarpaz sensibilizasiya nəzərə alınmalıdır. Xoşagəlməz hallar müşahidə edilən zaman dərhal təcili yardıma və ya birbaşa müalicə həkiminə müraciət edilməlidir.
Bir daha vətəndaşlara antibiotiklərdən özünü müalicə proqramında istifadə etməməyi, xəstəliyin irəliləmiş stadiyalarında stasionar xidmətə müraciət etmələrini, habelə əczaçılara dərman vasitələrinin istifadə təlimatına müvafiq buraxılmalı olduğunu tövsiyə edirik”, – məlumatda bildirilib.
AEM -dən bildirilib ki, ölkəyə rəsmi yolla idxal edilən dərman və tibb vasitələri ciddi yoxlanılır:
“Mərkəz dərmanların keyfiyyətini, təhlükəsizliyini və effektivliyini yoxlayaraq, idxalına icazə verməklə yanaşı, həmin dərman vasitələrinin istehsal edildiyi yerli və xarici müəssisələrdə də yoxlama aparır, həmin müəssisələrdə dərman vasitələrinin hansı şəraitdə istehsal edildiyinə də önəm verir. Bu sahədə dərman vasitələrinin keyfiyyəti, təhlükəsizliyi və effektivliyi Etibarlı İstehsalat Təcrübəsi (Good Manufacturing Practice – GMP) standartlarının tətbiqi ilə təmin olunur. Son illərdə Azərbaycanın əczaçılıq sahəsində sözügedən beynəlxalq tələblərə uyğunlaşdırılma istiqamətində ciddi addımlar atılır. Bir neçə gün öncə yeni GMP qaydalarının təsdiq edilməsini bu addımlardan biri kimi qeyd etmək olar”.
