Gəncə şəhərində narkotik vasitələrin qanunsuz dövriyyəsinə qarşı keçirilən əməliyyat zamanı külli miqdarda heroin aşkarlanıb.
Musavat.com xəbər verir ki, Gəncə Şəhər Baş Polis İdarəsinin əməkdaşları tərəfindən həyata keçirilən əməliyyat tədbirləri nəticəsində 33 yaşlı Ədil Ədilov narkokuryerlikdə şübhəli bilindiyi üçün saxlanılıb.
Araşdırma zamanı məlum olub ki, saxlanılan şəxsin əlində olan idman çantasına baxış keçirilərkən yüksək təsiredici xassəyə malik 27 kiloqram 475 qram narkotik vasitə – heroin aşkar edilərək götürülüb. Ədil Ədilov ifadəsində bildirib ki, narkotik vasitəni sosial şəbəkə vasitəsilə tanış olduğu, şəxsiyyəti istintaqla araşdırılan İran vətəndaşından əldə edib. O, həmin narkotikləri Gəncə şəhəri ərazisində müxtəlif ünvanlara çatdırmağı planlaşdırdığını etiraf edib.
Qeyd edək ki, saxlanılan şəxsdən götürülən heroinin “qara bazar”da dəyərinin təxminən 1 milyon 600 min manat olduğu bildirilir.
Faktla bağlı Gəncə Şəhər Baş Polis İdarəsində cinayət işi başlanılıb. Məhkəmənin qərarı ilə Ədil Ədilov barəsində həbs qətimkan tədbiri seçilib. Hazırda əməliyyat-istintaq tədbirləri davam etdirilir.
Musavat.com
