Portuqaliyalı futbol ulduzu Kriştianu Ronaldo və model Corcina Rodriqes bu həftəsonu ailə həyatı qurmağa hazırlaşırlar.
Cumhuriyyet.az xəbər verir ki, cütlük toy mərasimini Ronaldonun uşaqlıq illərini keçirdiyi Madeyra adasında keçirəcək.
Məlumata görə, təxminən 10 illik münasibətdən və beş övlad sahibi olduqdan sonra cütlük bayram məkanı kimi Funşaldakı dəbdəbəli beşulduzlu “Savoy Palace” otelini seçib. Otel panoramik mənzərəsi, damdakı hovuzu və fərdi xidmətləri ilə tanınır.
Toy mərasimi tarixi kafedralda keçiriləcək
Corcina Rodriqes nikah mərasimi üçün Madeyranın paytaxtı Funşalın tarixi mərkəzində yerləşən XII əsrə aid kafedralda altar önünə çıxacaq. Təxminən 800 nəfərlik tutumu olan kilsədən sonra cütlük cəmi beş dəqiqəlik məsafədə yerləşən otelə yollanacaq.
Onların otelin ən eksklüziv hissəsi olan “The Reserve” bölməsində qalacağı gözlənilir. Burada gecəlik qiymətlər 1100 funt sterlinqdən başlayır. Cütlüyün istifadəsinə şəxsi hovuz, istirahət zonaları, fərdi nahar məkanları və şəxsi batler xidməti veriləcək.
Dəbdəbəli ziyafət və xüsusi menyu
Toy ziyafətinin otelin möhtəşəm bal zalında və ya damdakı “Galáxia” restoranında keçirilməsi planlaşdırılır. Şam yeməyini məşhur aşpaz Roberto Barroşun hazırlayacağı, menyuda isə Madeyraya məxsus təamların müasir təqdimatla qonaqlara təqdim olunacağı bildirilir.
Mərasimdən sonra cütlük Avropanın ən böyük sağlamlıq və SPA mərkəzlərindən birində dincələcək.
Madeyranın toy məkanı kimi seçilməsi Ronaldo üçün xüsusi simvolik məna daşıyır. Milyardlarla dollar sərvətə malik olmasına baxmayaraq, o, həyatının ən önəmli gününü uşaqlığını keçirdiyi adada qeyd etməyə üstünlük verib.
Qeyd edək ki, Kriştianu Ronaldo ötən yay səkkiz illik münasibətdən sonra Corcina Rodriqesə evlilik təklifi etmişdi.
