Azərbaycan Respublikası Gənclər və İdman Nazirliyinin Kollegiyasının 16.12.2024-cü il tarixli 35 nömrəli qərarı ilə Qazax şəhəri 2026-cı il üçün Azərbaycanın “İdman paytaxtı” elan edilib. Artıq ilin əvvəlindən başlayaraq “Qazax İdman paytaxtı – 2026” çərçivəsində silsilə tədbirlər təşkil olunur.
Bədii gimnastika üzrə “Grace of Nature” turnirində gimnastların budəfəki dayanacağı qədim tarixə və zəngin mədəniyyətə malik “İdman paytaxtı” Qazax şəhəridir.
Azərbaycan Respublikası Gənclər və İdman Nazirliyi, Azərbaycan Gimnastika Federasiyası, Qazax Rayon İcra Hakimiyyətinin birgə təşkilatçılığı ilə bədii gimnastika üzrə “Grace of Nature” adlı turnir keçirilir.
10 və 11 oktyabr tarixlərində Qazax şəhəri ilk dəfə olaraq bədii gimnastika üzrə “Grace of Nature” turnirinə ev sahibliyi edir. Turnirdə paytaxt Bakı və regionları təmsil edən ümumilikdə 250-yə yaxın gimnast iştirak edir.
Qazax Olimpiya İdman Kompleksində keçirilən turnirdə paytaxt və bölgələri təmsil edən 20 klubdan balaca, yeniyetmə və gənc gimnastlar xalça üzərində məharətlərini nümayiş etdirəcəklər.
Yarışda paytaxt idmançılarına Abşeron, Sumqayıt, Ağdaş, Gəncə, Göyçay, İsmayıllı, Mingəçevir, Sabirabad, Şamaxı, Şəmkir, Şirvanı təmsil edən gimnaslar da qoşulub.
İki gün davam edəcək yarışda qaliblər yaş qruplarına müvafiq olaraq fərdi proqramda çoxnövçülük və ayrı-ayrı alətlər, qrup hərəkətləri proqramında isə ayrı-ayrı alətlər üzrə müəyyənləşəcək.
Turnirin açılış mərasimində Qazax Rayon İcra Hakimiyyətinin başçısı Rəcəb Babaşov, icra aparatının məsul işçiləri, Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri, Avropa İttifaqı Parlament Əməkdaşlıq Komitəsindəki nümayəndə heyətinin rəhbəri Səməd Seyidov, Azərbaycan Gimnastika Federasiyasının nünayəndələri, təchizat üzrə menecer Fuad Abbasov, milli yarışlar üzrə menecer Elmira Lələyeva, Qazax-Tovuz Regional Gənclər və İdman İdarəsinin rəisi Əziz Məsmalıyev və idarənin əməkdaşları, Yeni Azərbaycan Partiyası Qazax Rayon Təşkilatının sədri Anar Nəbiyev, gənclər, könüllülər, idmançılar, KİV nümayəndələri iştirak ediblər.
Əvvəlcə Azərbaycan Respublikasının Dövlət Himni səsləndirilib, Ulu Öndər Heydər Əliyevin və torpaqlarımızın azadlığı uğrunda canlarından keçən şəhidlərimizin əziz xatirəsi birdəqiqəlik sükutla ehtiramla yad edilib.
Qazax Rayon İcra Hakimiyyətinin başçısı Rəcəb Babaşov giriş sözü ilə çıxış edərək qonaqları və iştirakçıları, balaca fidanları salamlayıb, səmimi ürək sözlərini çatdıraraq yarışacaq gimnastlara uğurlar arzulayıb. Qərbin qapısı sayılan Qazaxda belə bir möhtəşəm turnirin keçirilməsinə görə Azərbaycan Gimnastika Federasiyasının rəhbərliyinə razılığını ifadə edən icra başçısı bu cür turnirlərin keçirilməsinin əhəmiyyətini vurğulayıb. Rayon rəhbəri Azərbaycan Respublikası Gənclər və İdman Nazirliyinin Kollegiyasının müvafiq qərarına əsasən Qazax şəhərinin 2026-cı il üçün Azərbaycanın “İdman paytaxtı” seçildiyini, bu münasibətlə Qazaxın mötəbər tədbirlərə, yarışlara, çempionatlara, turnirlərə ev sahibliyi etdiyini, ilin sonuna kimi yüksək səviyyəli tədbirlərin keçirilməsinin nəzərdə tutulduğunu diqqətə çatdırıb. Azərbaycan Gimnastika Federasiyasının təşkil etdiyi bugünkü turniri həmin silsilə tədbirlərin davamı kimi qiymətləndirərək bu işdə əziyyəti keçən hər kəsə təşəkkür edib.
Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri, Avropa İttifaqı Parlament Əməkdaşlıq Komitəsindəki nümayəndə heyətinin rəhbəri Səməd Seyidov çıxış edərək yarış iştirakçıları olan balaca fidanlara uğurlar arzulayıb. Respublika Prezidenti İlham Əliyev, Birinci vitse-prezident Mehriban xanım Əliyeva tərəfindən idman sahəsinə, idmançılara, xüsusilə də gimnastika idman növünə göstərilən dövlət qayğısından söz açan millət vəkili bugünkü turniri həmin qayğının davamı kimi qiymətləndirib.
Sonra yarışa start verilib. Balaca fidanlar qalib adı uğrunda öz məharətlərini göstəriblər. Qaliblər mükafatlandırılıb, xatirə şəkli çəkdirilib.
