“Radio-Televiziya Yayımı və Peyk Kommunikasiyasi” İstehsalat Birliyinin “Azərsell” mobil operatorunun idarəçiliyinə veriləcəyi gözlənilir. Bu barədə Gununsesi.info-ya daxil olan məlumata görə, artıq bununla bağlı prosesə start verilib.
Qeyd edək ki, “Radio-Televiziya Yayımı və Peyk Kommunikasiyasi” İstehsalat Birliyi ötən il prezident İlham Əliyevin fərmanı ilə təsis olunan Azərbaycan Nəqliyyat və Kommunikasiya Holdinqin (AZCON) tərkibinə daxil edilib.
Dövlətin strateji obyektinin Azercell kimi kommersiya şirkətinə verilməsi nə dərəcədə məntiqlidir?
Çünki, bu qərar milli informasiya təhlükəsizliyi baxımından risklər yarada bilər.
Xatırladaq ki, “Teleradio” İB 1956-cı ildən televiziya və radio yayımı sahəsində ölkənin strateji dövlət qurumu kimi fəaliyyət göstərir.
“Teleradio” İB respublikada radio-televiziyanın yerüstü yayımını, radio rabitəsini (radio-rele xətt şəbəkəsinin istismarını), radio-televiziya proqramlarının peykdən yayımını və s. xidmətləri təmin edən dövlət müəssisəsidir.
Əgər belə bir qərar həqiqətən nəzərdə tutulubsa, bu prosesin şəffaflığı, ictimaiyyətin və sahə mütəxəssislərinin rəyi hansı formada təmin ediləcək?
Onu da vurğulayaq ki, Nazirlər Kabinetinin qərarı ilə “Teleradio” İstehsalat Birliyi “Azərbaycan Respublikasında mühafizə olunmalı, həyat təminatlı, mühüm əhəmiyyətli obyektlərin Siyahısı”na daxil edilib.
Məsələ ilə bağlı Gununsesi.info olaraq, AZCON-na müvafiq sorğu ünvanlamışıq.
