Xəbər verildiyi kimi, Baş Prokuror yanında Korrupsiyaya qarşı Mübarizə Baş İdarəsi Qaradağ Rayon İcra Hakimiyyətində yoxlamalar aparıb. Yoxlamalar nəticəsində rayonun icra başçısının müavini Muradov Nadir Yədulla oğlu və və Təsərrüfat şöbəsində baş məsləhətçi- mühəndis vəzifəsində çalışan Qafar Abdullayev həbs edilib. Hər iki məmur barəsində 4 aylıq həbs qərarı çıxarılıb.
Etibarlı mənbədən cumhuriyyet.az-a daxil olan məlumata görə həbs Qaradağ rayonu ərazisində torpaq sahibi olmaq istəyən vətəndaşdan küllü miqdarda pul istənilməsi olub. Mənbənin sözlərinə görə pul icra başçısının müavini Nadir Muradov tərəfindən istənilsə də Təsərrüfat şöbəsində təqdim edilib və qrup iş üstündə yaxalanıb. Heç şübhəsiz ki, bu əməliyyat icra başçısının xəbəri olmadan aparılmayıb. Buna görə də 15 ildən artıqdır ki, Qaradağ rayonuna rəhbərlik edən, bir zamanlar “Çakır” ləqəbi ilə məhşurlaşmış Süleyman Mikayılov həbslərdən bərk narahatdır. Cumhuriyyet.az-a daxil olan məlumata görə, əməliyyatdan dərhal sonra icra başçısı prosesə müdaxilə edərək əməkdaşlarını qurtarmağa cəhd edib, amma ona rədd cavabı verilib. İddialara görə küllü miqdarda pul tələb edilən vətəndaş yüksək vəzifə sahibinin yaxını olub və bu səbəbdən icra başçısının da prosesə nə dərəcədə bağlı olduğu araşdırılır.
Mövzunu diqqətdə saxlayacağıq.
