Hər kəsə yaxşı məlumdur ki, son illər ölkəmizdə lift təsərrüfatının maddi-texniki bazasının möhkəmləndirilməsi istiqamətində məqsədyönlü işlər görülür. “Azərbaycan Respublikasında çoxmənzilli binaların lift təsərrüfatının maddi-texniki bazasının möhkəmləndirilməsi ilə bağlı əlavə tədbirlər haqqında” Respublika Prezidenti İlham Əliyevin 2025-ci il 28 fevral tarixli Sərəncamı da bunun bariz nümunəsidir. Sözügedən Sərəncamın Əlavəsində lift təsərrüfatının maddi-texniki bazasının möhkəmləndirilməsi nəzərdə tutulmuş doqquzmərtəbəli binaların şəhərlər üzrə bölgüsünə dair siyahıda 7 şəhər üzrə 200 ədəd liftin quraşdırılması nəzərdə tutulub. Həmin liflərdən 2 ədədi Qazax şəhəri Heydər Əliyev prospekti 179 saylı doqquzmərtəbəli yaşayış binasında quraşdırılacaq. Artıq bir neçə gündür ki, 179 saylı doqquzmərtəbəli yaşayış binasında köhnə liftlərin yerinə yeni liftlərin quraşdırılmasına start verilib.
Mediaxeberleri.Az-ın məlumatına görə, noyabrın 24-də Qazax Rayon İcra Hakimiyyətinin başçısı Rəcəb Babaşov sözügedən çoxmənzilli yaşayış binasında olub, liftlərin quraşdırılması ilə bağlı görülmüş işlərlə yerində maraqlanıb. İşlərin keyfiyyətlə aparılmasını vurğulayan rayon rəhbəri aidiyyəti üzrə müvafiq tapşırıqlarını verib.
Rayon rəhbəri ilə səmimi söhbət edən bina sakinləri ölkəmizdə vətəndaşlara göstərilən qayğıya görə Prezident İlham Əliyevə, Birinci vitse-prezident Mehriban xanım Əliyevaya bir daha dərin minnətdarlıqlarını bildiriblər. Sakinlər yaşadıqları binada olan liftlərin dəfələrlə rayon rəhbərliyi tərəfindən təmir olunsa da günün tələblərinə cavab vermədiyini, yenisi ilə əvəz edilməsinə böyük ehtiyac olduğunu vurğulayıblar. Dövlət başçısının lift təsərrüfatının maddi-texniki bazasının möhkəmləndirilməsi ilə əlaqədar imzaladığı müvafiq sərəncama əsasən qeyd edilən şəhərlər arasında Qazax rayonunun olmasını, yaşadıqları binanın liftlərinin yenisi ilə əvəz olunmasını ölkə Prezidentinin vətəndaşlara olan növbəti qayğısı kimi qiymətləndiriblər. Köhnə liftlərin yenisi ilə əvəz olunmasını, qısa vaxtda təhvil verilməsini yeni il qabağı bina sakinlərinə olan ən böyük töhfə kimi dəyərləndiriblər.
