Qazaxıstan hökuməti 2025-ci ilin sonuna qədər Aktau hava limanı yaxınlığında qəzaya uğrayan “Azərbaycan Hava Yolları”na (AZAL) məxsus təyyarənin təhqiqatı ilə bağlı məlumat verəcək.
Musavat.com xəbər verir ki, bu barədə Qazaxıstanın nəqliyyat nazirinin müavini Maksat Kaliakparov brifinqdə məlumat verib.
Onun sözlərinə görə, faciədən 3 ay sonra müvafiq komissiyaya təqdim edilən ilkin nəticələrə əsasən, daha dərin mürəkkəb ekspertizalar aparılır.
Kaliakparov qeyd edib ki, iş mürəkkəbdir və bir sıra hərtərəfli tədqiqatları əhatə edir. O vurğulayıb ki, araşdırma başa çatdıqdan sonra hesabat əvvəlki kimi tam şəkildə mediaya açıqlanacaq.
Nazir müavini istintaqı son dərəcə ciddi adlandırıb və əlavə edib ki, bu ilin sonuna qədər yeni məlumatların təqdim edilməsi planlaşdırılır.
Xatırladaq ki, 2024-cü il dekabrın 25-də Bakıdan Qroznıya uçan “Azərbaycan Hava Yolları”na məxsus “Embraer” təyyarəsi Aktau yaxınlığında qəzaya uğrayıb. Təyyarədə 62 nəfər – 37 Azərbaycan vətəndaşı, 16 Rusiya vətəndaşı, altı Qazaxıstan vətəndaşı, üç Qırğızıstan vətəndaşı və beş ekipaj üzvü olub. 38 nəfər ölüb, üçü uşaq olmaqla 29 sərnişin sağ qalıb.
İlkin məlumatlara görə, qəzaya səbəb Rusiya hava məkanında təyyarəyə kənar müdaxilə olub.
