Dövlətə qarşı xəyanətdə ittiham edilən Prezident Administrasiyasının sabiq rəhbəri Ramiz Mehdiyevin sahib olduğu çoxsaylı mülklər, saysız-hesabsız daşınmaz əmlak nümunələri ilə bağlı media və sosial mediada müzakirələr davam edir. Ölkə paytaxtından tutmuş ucqarlarına qədər respublikanın demək olar ki, hər yerində çoxsaylı əmlaka sahib olan Ramiz Mehdiyevin Bakıda İzmir parkının yaxınlığında da 22 mərtəbəli kompleksə malik olduğu ilə bağlı iddialar səslənməkdədir. Cəmiyyətdə dolaşan və hələlik rəsmi şəkildə öz təsdiqini tapmayan məlumatlara görə, Ramiz Mehdiyevə sözügedən kompleksin ərazisini FHN şefi Kəmaləddin Heydərov hədiyyə edib. Belə ki, həmin ərazinin FHN-ə məxsus olduğu, sonradan bu ərazinin bir hissəsinin Ramiz Mehdiyevə verildiyi iddia olunur. Məlumat üçün qeyd edək ki, bu gün də həmin ərazidə FHN-ə məxsus idarə yerləşir.
Çox güman ki, Ramiz Mehdiyevlə bağlı bütün iddialar kimi bu iddia da əlaqədar hüquq-mühafizə orqanları tərəfindən ətraflı şəkildə araşdırılacaq, ortaya çıxan həqiqətlər əsasında gərəkli addımlar atılacaq.
