“Biz illərdir deyirik ki, Dövlət Gömrük Komitəsinin ayrıca bir qurum kimi qalmasına heç bir ehtiyac yoxdur. Dünyanın nadir ölkələrində bu sahədə ayrıca qurum fəaliyyət göstərir”. Bu sözləri “Yeni Sabah”a açıqlamasında Respublikaçı Alternativ Partiyasının (ReAL) sədri, iqtisadçı Natiq Cəfərli deyib.
O bildirib ki, ilk dəfə deyil Dövlət Gömrük Komitəsində əməliyyat keçirilir: “Dövlət Gömrük Komitəsi ilk növbədə hərbisizləşdirilməlidir. Onların hərbi rütbələrinin olmasının da bir mənası yoxdur. Bu komitə ya İqtisadiyyat, ya da Maliyyə Nazirliyinin tərkibində kiçik bir departament kimi, sahibkarın üzünü görmədən fəaliyyət göstərən bir quruma çevrilməlidir. Bunun başqa çıxış yolu yoxdur. Bu saxlanmalar nə birincidir, nə də sonuncu. 34 illik müstəqillik dövründə dəfələrlə Dövlət Gömrük Komitəsində korrupsiya və digər qanun pozuntuları ilə aşkarlanıb. Deməli bu strukturun özünün problemi var. Ola bilməz ki, yüzlərlə insanın hamısı cinayətkar olsun. Bu struktur özü kökündən ləğv edilməli və yeni formatda nazirliklərin birinin tabeçiliyinə verilməlidir”.
Qeyd edək ki, Dövlət Gömrük Komitəsinin Dəniz Nəqliyyatı və Enerji Resursları Baş Gömrük İdarəsinin Bakı Hövsan Beynəlxalq Ticarət Dəniz Limanı Gömrük postu, “Bakı Hövsan Beynəlxalq Ticarət Dəniz Limanı” Açıq Səhmdar Cəmiyyətinin əməkdaşları və cinayətkar birliyin digər üzvlərinin qanunsuz əməlləri barədə cinayət işi üzrə istintaq tədbirləri nəticəsində “Bakı Hövsan Beynəlxalq Ticarət Dəniz Limanı” ASC-nin faktiki rəhbəri Ruslan Eyyubov, ASC-nin baş direktoru Rəşad Daşdəmirov, Liman xidmətinin rəisi Zaur Haşımov, Limanın briqadiri Fərrux Haqverdiyev, Dövlət Gömrük Komitəsinin Dəniz Nəqliyyatı və Enerji Resursları Baş Gömrük İdarəsinin Bakı Hövsan Ticarət Dəniz Limanı Gömrük postunun rəisi Fərid Usubov, həmin Gömrük postunun inspektorları Heydər Eyvazlı, Tamerlan Axundzadə və Tahir Tahiri qeyd olunan Baş Gömrük İdarəsinin Əməliyyat Təhqiqat İdarəsinin Əməliyyat şöbəsinin böyük əməliyyat müvəkkili Ənvər Tağıyev, habelə tütün məmulatlarının nəqliyyat vasitələri ilə daşınması və saxlanmasını həyata keçirən Elçin Rüstəmov, Fariz Məhərrəmov, Firuz Əliyev, Amil Cəbrayılov, Ələsgər İsmayılov, Rövşən Tarverdiyev, eləcə də istintaqla şəxsiyyətləri araşdırılan qeyriləri mütəşəkkil dəstə halında cinayət əlaqəsinə girməklə Birləşmiş Ərəb Əmirlikləri və İran İslam Respublikasından ümumilikdə 5,4 milyon manatdan artıq dəyərdə aksiz markası ilə markalanmalı olan tütün məmulatlarını belə marka olmadan gəmi ilə qeyd edilən Limandan qaçaqmalçılıq yolu ilə ölkə ərazisinə keçirmələrinə əsaslı şübhələr müəyyən edilib.
İş üzrə Ruslan Eyyubov, Rəşad Daşdəmirov, Fərid Usubov, Heydər Eyvazlı, Tamerlan Axundzadə, Zaur Haşımov, Fərruz Haqverdiyev, Fariz Məhərrəmov barəsində ibtidai istintaqı orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs, Firuz Əliyev barəsində həbslə bağlı olmayan qətimkan tədbiri seçilib, digər şəxslər istintaqdan yayınmaq məqsədilə ölkə ərazisini tərk etdiklərinə görə barələrində qiyabi həbs qətimkan tədbiri seçilməklə beynəlxalq axtarış elan olunub.
