Son günlər sabiq MTN şefi Namiq Abbasovun vaxtiylə hakimiyyət daxilində hansısa qruplaşma yaratdığı, yaxud hansısa qruplaşmada iştirak etdiyi, sabiq müdafiə naziri Səfər Əbiyevi də bu qruplaşmaya cəlb etmək istədiyi ilə bağlı fikirlər səslənməkdədir. Halbuki, bu iddiaların doğruluğunu sübut edən heç bir fakt olmadığı kimi, səsləndirilən iddiaların özü də son dərəcə məntiqdən kənardır.
Hər şeydən öncə, qeyd edək ki, Namiq Abbasov Ulu Öndər Heydər Əliyevin ən çox güvəndiyi, etibar etdiyi kadralrdan biri olub. Ölkəmiz üçün ən təlatümlü zamanlarda Namiq Abbasovun Milli Təhlükəizlik Nazirliyinin rəhbərliyinə gətirilməsi faktı bunun ən bariz isbatıdır. Bu fakt sübut edir ki, Ümummilli Liderin çətin məqamda ölkənin mili təhlükəsizliyi ilə bağlı problemlərin həllində ən çox inandığı şəxslərdən biri Namiq Abbasov olub. Bu gün də müstəqillik tariximizin ən savadlı və peşəkar kadrlarından biri kimi xatırlanan Namiq Abbasov, həm də Ulu Öndər Heydər Əliyev ideyalarına sadiqliyi ilə diqqət çəkib. Elə bu səbəbdən də heç vaxt onunla bağlı bu və ya digər məsələlərdə hər hansı ittiham və ya fakt gündəmə gəlməyib.
Səfər Əbiyevin Namiq Abbasov tərəfindən ələ alınmağa cəhd edilməsi ilə bağlı səslənən fikirlər də məntiqlə o qədər də uzlaşmır. Çünki Namiq Abbasov kimi Səfər Əbiyev də hər zaman Ümummilli Liderə sədaqəti ilə diqqət çəkib, uzun müddət müdafiə naziri kimi mühüm bir postda xidmət edib. Həmin vaxt sadəcə Səfər Əbiyev deyil, onun bir sıra yaxın qohumları müxtəlif dövlət qurumlarında, eləcə də Dövlət Gömrük Xidmətində çalışırdı. Bütün bunların hamısı Heydər Əliyev hakimiyyəti dönəmində baş vermişdi. Başqa sözlə dessək, Namiq Abasov kimi, Səfər Əbiyevin də Heydər Əliyevdən narazı olmaları üçün heç bir səbəb mövcud deyildi. Belə olan halda, Namiq Abbasovun hansısa qrupıaşmada təmsil olunması, Səfər Əbiyevi də bu qruplaşmaya dəvət etmələri ilə bağlı deyilənlərə inanmaq üçün heç bir əsas yoxdur.
Bundan başqa, Səfər Əbiyevlə Heydər Əliyev arasındakı münasibətlərin yaxınlığı hər kəs, eləcə də Namiq Abbasova məlum idi. Belə olan halda, Səfər Əbiyevə edilən təklifin sonuncu tərəfindən Heydər Əliyevə çatdırılacağı mütləq idi və Namiq Abbasov da peşəkar bir çekist kimi bunu nəzərə almaya bilməzdi. Belə olan halda, Namiq Abbasovun Səfər Əbiyevi hansısa qruplaşmaya dəvət etməsi MTN şefi üçün intihar demək idi. Yəni, Namiq Abbasov Heydər Əliyevə müxalif hansısa qruplaşmada təmsil olünsa idi belə, hansı ki, yuxarıda qeyd etdiyimiz kimi, bu, mümkünsüz idi, o, heç vaxt bu barədə Səfər Əbiyevə dəvət mesajı göndərməzdi.
Bütün bu arqumentlər bir daha sübut edir ki, Namiq Abbasov və Səfər Əbiyev haqqında səslənən bu iddialar əsassızdır və heç bir ciddi fakta söykənmir.
