Bir zamanlar hamı buradan qaçmaq istəyirdi, indi qalmaq üçün pul verirlər – Fotolar

Qlobal turizm sənayesində son illərdə diqqətçəkən yeni istiqamətlərdən biri tarixi məkanların yenidən funksionallaşdırılmasıdır. Bu çərçivədə ən maraqlı və qeyri-adi tendensiyalardan biri bir vaxtlar məhkumların saxlanıldığı həbsxanaların lüks hotellərə çevrilməsidir. “Xilas edilmiş qalıqlar” (“Salvaged stays”) kimi tanınan bu yanaşma sərt və qapalı məkanları müasir komfort və estetiklə birləşdirərək, turistlərə həm tarixi, həm də emosional baxımdan fərqli təcrübə təqdim edir.

“Qafqazinfo” xəbər verir ki, bir vaxtlar azadlığın məhdudlaşdırıldığı, soyuq daş divarları və dəmir barmaqlıqları ilə tanınan bu binalar bu gün yüksək səviyyəli xidmət, dizayn və komfortla seçilən turizm obyektlərinə çevrilir.

Bu cür məkanlar yalnız qalmaq üçün yer deyil, həm də ziyarətçilərə keçmişlə canlı təmas imkanı yaradan mədəni mühit kimi təqdim olunur.

1918-ci ildə tanınmış memar Kəmaləddin bəy tərəfindən inşa edilən bina uzun müddət həbsxana kimi fəaliyyət göstərib. Burada Nazim Hikmət və Orxan Kamal kimi ədiblər saxlanılıb və onların bəzi məşhur əsərləri məhz bu divarlar arasında yazılıb. 1996-cı ildə əsaslı bərpadan sonra hotel kimi fəaliyyətə başlayan bina bu gün tarixi elementləri qorumaqla yanaşı, müasir lüks xidmətlər təqdim edir.

Yaponiyanın Nara şəhərində yerləşən keçmiş yetkinlik yaşına çatmayanlar üçün həbsxana isə “Hoshinoya Nara” adı ilə hotelə çevrilib.

1908-ci ildə tikilən və 2017-ci ilə qədər fəaliyyət göstərən bina sonradan mədəni irs elan olunub. Layihə çərçivəsində orijinal memarlıq xüsusiyyətləri qorunub saxlanılıb, eyni zamanda müasir dizayn elementləri ilə zənginləşdirilib. Hoteldəki otaqlar bir neçə kameranın birləşdirilməsi ilə yaradılıb, ərazidə isə həbsxananın tarixini əks etdirən muzeyin fəaliyyət göstərməsi planlaşdırılır.

Almaniyanın Offenburq şəhərində yerləşən “Liberty Hotel” də bu konsepsiyanın uğurlu nümunələrindəndir.

XIX əsrdə siyasi məhbuslar üçün nəzərdə tutulmuş bina 2017-ci ildə hotel kimi yenidən açılıb. Burada keçmişə istinad edən detallar – kamera qapıları və “Wasser & Brot” adlı restoran konsepti saxlanılıb.

ABŞ-nin Boston şəhərində yerləşən tarixi Çarlz Küçəsi həbsxanası da bu tendensiyanın bir hissəsidir və bu gün “The Liberty Hotel” kimi fəaliyyət göstərir.

1851-ci ildə inşa edilən bina 1990-cı ilə qədər həbsxana kimi istifadə olunub. Daha sonra hotelə çevrilən kompleksdə orijinal memarlıq elementləri, o cümlədən, dəmir barmaqlıqlar və kameralar qorunub saxlanılıb.

Avstraliyada yerləşən keçmiş “Pentridge” həbsxanası isə genişmiqyaslı transformasiya nümunəsidir. Ərazidə fəaliyyət göstərən “The Interlude” adlı butik hotel bir neçə kameranın birləşdirilməsi ilə yaradılmış suit otaqları ilə seçilir.

Kompleksdə həmçinin restoranlar, əyləncə məkanları və sağlamlıq zonaları mövcuddur.

Keçmiş həbsxanaların lüks hotellərə çevrilməsi müasir turizmdə fərqli və diqqətçəkən istiqamətlərdən biri kimi formalaşıb. Bu məkanlar ziyarətçilərə həm tarixə səyahət, həm də yüksək səviyyəli istirahət imkanı təqdim edir.