Xəbər verdiyimiz kimi, tam (11 illik) orta təhsil səviyyəsi üzrə 15 mart 2026-cı il tarixində keçirilmiş buraxılış imtahanında 9 nəfər 300 bal toplayaraq maksimum nəticə göstərib.
Onlardan bəziləri sevinclərini “Qafqazinfo” ilə bölüşüblər.
“İmtahana sistemli şəkildə hazırlaşırdım. Həm dərslərimə, həm də dərsdənkənar fəaliyyətlərimə ayrı-ayrı vaxt ayırırdım. Bəzi suallara görə şübhələrim olsa da, 290-dan yuxarı bal gözləyirdim, lakin maksimum nəticə mənə də bir az sürpriz oldu.
İmtahan çox çətin deyildi, lakin vaxt çatışmazlığı hiss olunurdu, xüsusən də Azərbaycan dili fənnində. Qeyd edim ki, 7-ci sinifdə fizika fənni üzrə Respublika fənn müsabiqəsində qızıl, 9-cu sinifdə isə Respublika fənn olimpiadalarında bürünc medala layiq görülmüşəm.
Gələcək planlarıma gəlincə, bakalavr təhsilimi Azərbaycanda tamamlayıb, daha sonra nüfuzlu xarici universitetlərdə təhsilimi davam etdirməyi düşünürəm. Ən böyük arzum kompüter mühəndisi olmaqdır”.
Bakı şəhəri, 18 saylı orta məktəbin şagirdi olan Zəhra Zərbəliyeva isə qeyd edib ki, imtahan müddəti 4 saat olsa, yüksək bal toplayanların sayı daha çox olardı:
“Bəli, imtahan çətin idi, amma deyərdim ki, sualların mürəkkəbliyindən daha çox vaxt məhdudiyyəti hiss olunurdu. İmtahan müddəti 3 saat yox, 4 saat olsaydı, düşünürəm ki, yüksək nəticə göstərənlərin sayı daha çox olardı.
Düzünü desəm, 300 balı yox, 290-dan yuxarı gözləyirdim, lakin ətrafımdakı hər kəs 300 bal toplayacağımı deyirdi. Onlar mənə, bəlkə də, özümdən çox inanırdılar. Bu uğurumda valideynlərimin və müəllimlərimin əziyyəti əvəzsizdir. Gələcək planım blok imtahanında da yüksək nəticə göstərərək ADA Universitetinin dövlət sifarişli ixtisaslarından birinə qəbul olmaqdır. Magistratura təhsili üçün xaricə getmək isə ən böyük xəyallarımdan biridir”.
Bakı şəhəri Humanitar Fənlər Təmayüllü Liseyin şagirdi Zəhra Xammədova isə adaşından fərqli olaraq maksimum nəticə gözləyirmiş:
“İmtahanlara çox əzmlə və iradə ilə hazırlaşdım. Bəli, maksimum nəticə gözləyirdim. İmtahan sualları orta səviyyəli olsa da, bəziləri kifayət qədər düşündürücü idi. İmtahanda cüzi həyəcan keçirsəm də, hədəfimə nail olmağı o qədər çox istəyirdim ki, son dəqiqələrdə həyəcanımı tamamilə unutmuşdum.
Yuxusuz gecələrimin bəhrəsini görmək məni çox xoşbəxt etdi. Əsas hədəfim ATU-ya qəbul olmaq və gələcəkdə kardiocərrah kimi fəaliyyət göstərməkdir”.
Qusar rayonu Yuxarı Zeyxur kənd tam orta məktəbinin şagirdi Emiliya Qayıbova 9-cu sinif buraxılış imtahanında da yüksək nəticə göstərdiyini qeyd edib:
“Təbii ki, həm mən, həm də ailəm bu uğuru böyük sevinc hissi ilə qarşıladıq. Böyük zəhmət tələb edən bu nəticəni qazanmaq hər birimizi çox sevindirdi. Düzünü desəm, yüksək nəticə gözləyirdim, çünki imtahan sualları orta səviyyəli idi.
Riyaziyyat olimpiadalarına hazırlaşırdım; rayon (şəhər) mərhələsini 95, yarımfinalı isə 100 balla keçmişəm. Ötən günlərdə final mərhələsində iştirak etdim və hazırda nəticələri gözləyirəm. Bundan əvvəl isə Fermat beynəlxalq riyaziyyat olimpiadasının milli mərhələsində birinci yerə layiq görülmüşəm. Hazırda birinci ixtisas qrupu üzrə hazırlaşıram, hədəfim kompüter elmləri ixtisasına qəbul olmaqdır. Məlumat üçün bildirim ki, 9-cu sinif buraxılış imtahanında da 297 bal toplamışdım”.
Bakı şəhəri, Humanitar Fənlər Təmayüllü Məktəb-Liseyin şagirdi Nəslihan Məmmədli isə təəssüratlarını belə ifadə edib:
“İmtahanlara çox gərgin və intensiv hazırlaşırdım, buna görə də maksimum nəticə gözləyirdim. İmtahan müəyyən qədər çətin olsa da, sualların səviyyəsi 9 martda keçirilmiş imtahanla eyni idi. Sadəcə, biz həmin tarixdəki suallarla tanış olduğumuz üçün hər şeyə daha hazırlıqlı idik.
Gələcək hədəfim Bakı Ali Neft Məktəbinin (BANM) Kimya mühəndisliyi ixtisasına yiyələnməkdir. Təhsilimin növbəti mərhələlərini isə xaricdə davam etdirməyi düşünürəm.
Sumqayıt şəhəri, 17 saylı orta məktəbin şagirdi Əli Əsgərov uğurunun sirrini belə açıb:
“Ciddi hazırlaşaraq buraxılış imtahanında yüksək nəticə əldə etməyi bacardım. Mənim üçün ən çətin fənn Azərbaycan dili idi. Bu səbəbdən digərləri ilə yanaşı, xüsusilə bu istiqamətdə daha əzmlə çalışdım və nəticədə hədəfimə çatdım.
Əsas məqsədim Bakı Ali Neft Məktəbinin (BANM) İnformasiya təhlükəsizliyi ixtisasına qəbul olmaqdır. Gələcəkdə də fəaliyyətimi məhz bu sahə üzrə qurmağı planlaşdırıram.
Təhsilimi xaricdə, yoxsa Azərbaycanda davam etdirəcəyim barədə hələ tam qəti qərar verməmişəm. Bu yolda digər abituriyentlərə tövsiyəm odur ki, aydın məqsədləri olsun və bu məqsəd uğrunda davamlı şəkildə çalışsınlar. Gün ərzində zamanı düzgün bölüşdürmək və dərslərə kifayət qədər vaxt ayırmaq uğurun əsas açarıdır. Hazırlıq dövründə asudə vaxtlarımı kitab oxuyaraq, film izləyərək və ya açıq havada gəzərək keçirirdim. Əvvəllər olimpiadalarda iştirak etsəm də, medal qazanmaq nəsib olmamışdı. İlk böyük uğurum isə məhz bu imtahanda 300 bal toplamağım oldu”.
Bəsti Məmməd
