Bir neçə gün öncə Qazaxıstan Respublikasının elm və ali təhsil naziri Sayasat Nurbek və Azərbaycanın bu ölkədəki səfiri Ağalar Atamoğlanov ali təhsilin beynəlmiləl səviyyədə təşviqi, elm və ali təhsil sahəsində ikitərəfli əməkdaşlığın inkişafı və akademik əlaqələrin dərinləşdirilməsi məsələlərini müzakirə ediblər.
AZƏRTAC Qazaxıstan Respublikasının Elm və Ali Təhsil Nazirliyinə istinadla xəbər verir ki, “EasyDanismanlik” şirkətinin təsisçisi və nümayəndə heyətinin üzvlərinin də qatıldığı görüşdə tərəflər tələbələr və müəllim heyəti üçün akademik mobilliyin inkişafı, birgə təhsil proqramlarının həyata keçirilməsi, beynəlxalq tərəfdaşlığın genişləndirilməsi və xarici vətəndaşların Qazaxıstanın ali və aspirantura təhsili müəssisələrində təhsilə cəlb edilməsi ilə bağlı fikir mübadiləsi aparıblar.
Maraqlıdır, “EasyDanismanlik” bu görüşdə hansı statusla iştirak edib? Bu şirkət nə ali təhsil müəssisəsidir, nə də dövlət qurumudur. Onun dövlət adından bu cür yüksək səviyyəli görüşdə təmsil olunmasına hansı hzərurət olduğuna dair ictimaiyyətə hər hansı məlumat təqdim edilməyib. Daha diqqətçəkən məqam isə görüşün məzmunudur. Rəsmi məlumatda qeyd olunur ki, tərəflər xarici vətəndaşların Qazaxıstanın ali və aspirantura təhsili müəssisələrinə cəlb olunmasını müzakirə ediblər. Halbuki Azərbaycan son illər ali təhsilin beynəlmiləlləşdirilməsini prioritet istiqamətlərdən biri elan edib və “Study in Azerbaijan” layihəsi vasitəsilə xarici tələbələrin məhz Azərbaycan universitetlərinə cəlb edilməsinə çalışır. Belə olan halda, Azərbaycanın səfirinin iştirakı ilə keçirilən görüşdə başqa bir ölkənin ali məktəblərinə xarici tələbələrin cəlb olunmasının müzakirəsi və bu müzakirədə özəl bir şirkətin iştirak etməsi təbii olaraq suallar yaradır.
Məsələ ilə bağlı cumhuriyyet.az olaraq apardığımız araşdırma zamanı məlum oldu ki, xarici ölkələrə tələbə qəbulu xidməti göstərən “EasyDanismanlik” şirkətinin heç bir ölkənin Təhsil Nazirliyi ilə bir bağlantısı yoxdur və rəsmi lisenziya almayıb. Sadəcə olaraq vergi ödəyicisi kimi qeydiyyatdan keçib xidmət göstərir. Əlbəttə ki, bu, hüquq pozuntsu deyil. Sadəcə olaraq valideynlər, abituriyentlər bilməlidir ki, xaricdə təhsil xidməti göstərən belə şirkətlərin hansısa üstünlüyü yoxdur. Onlar özləri də, istədikləri xarici universitetin saytından qeydiyyatdan keçib tələb olunan sənədləri göndərməklə bu prosesi həyata keçirə bilərlər. Yeri gəlmişkən, “EasyDanismanlik” şirkətinin öz inteqram səhifəsində imtahansız(?) qəbul təklif etməsi də ciddi şübhələr yaradır.
Burada söhbət hər hansı şirkətin fəaliyyətini tənqid etməkdən getmir. Məsələ dövlət institutlarının tərəfsizliyi, şəffaflığı və bərabər rəqabət prinsiplərinə nə dərəcədə əməl olunması ilə bağlıdır. Dövlətin diplomatik nümayəndəliyi ayrı-ayrı özəl şirkətlərin deyil, Azərbaycan dövlətinin və onun milli maraqlarının təmsilçisidir. Buna görə də belə görüşlərdə özəl sektorun iştirakı başa düşülən olsa da, bunun hansı prinsiplər əsasında formalaşdığı və dövlət maraqları ilə necə uzlaşdığı ictimaiyyət üçün aydın olmalıdır. Bu, həm şəffaflığın təmin edilməsi, həm də dövlət institutlarına ictimai etimadın qorunması baxımından vacib məsələdir.
