Bu gün əminliklə deyə bilərik ki, son illər ölkə Prezidenti İlham Əliyevin diqqət və qayğısı sayəsində gündən-günə abadlaşan bölgələrimizdən biri də Qazax rayonudur. Bunu regionların sosial-iqtisadi inkişafı dövlət proqramlarının uğurlu icrası sayəsində rayonda həyata keçirilən genişmiqyaslı quruculuq işləri söyləməyə əsas verir. “Azərsu” ASC tərəfindən Qazax şəhərinin içməli su və tullantı su sistemlərinin yenidən qurulması layihəsinin icrasından sonra şəhərin prospekt və küçələrinin asfaltlanması, səkilərə yeni tamet, bardür düzülməsi, qaz, elektrik, rabitə xətlərinin səliqəyə salınması, küçələrin işıqlandırılması söylədiklərimizin bariz nümunəsidir.
Şəhərin Heydər Əliyev prospektində, bir neçə küçədə, eləcə də çoxmənzilli yaşayış binalarının həyətinə yeni asfalt örtüyü vurulmuş, abadlıq işləri aparılaraq “Abad məhəllə” kimi sakinlərin istifadəsinə verilib. Rayonda aparılan abadlıq işləri bu gün də uğurla davam etdirilir. Nəqliyyat vasitələrinin hərəkətinin yaxşılaşdırılması, vətəndaşların rahatlığını təmin etmək məqsədilə təqdirəlayiq işlər görülür.
Ötən yazılarımızda Qazax rayonunda daha 4 küçəyə – şəhərin Nəsrəddin Tusi, şəhid Yunis Kazımov (Bakı küçəsindən M.Ə.Rəsulzadə küçəsinin kəsişməsinə kimi), Ağköynək kəndində Çərkəz İsmayılov və Cabir Hüseynov (Mehdi Hüseyn küçəsinin kəsişməsindən magistral yola kimi) küçələrinə yeni asfalt örtüyünün döşənəcəyi barədə məlumat vermişdik. Artıq sözügedən küçələrdən ikisində – Ağköynək kəndində yerləşən Cabir Hüseynov və Çərkəz İsmayılov küçələrində asfaltlanma başa çatıb. Hazırda isə Çərkəz İsmayılov küçəsində digər son tamamlanma işləri həyata keçirilir.
Həmçinin, şəhərin Nəsrəddin Tusi küçəsinin asfaltlanması davam etdirilir.
Yanvarın 13-də Qazax Rayon İcra Hakimiyyətinin başçısı Rəcəb Babaşov yeni asfalt örtüyü döşənən Nəsrəddin Tusi küçəsində olub, görüləcək işlərlə maraqlanıb.
Sakinlər yaşadıqları küçəyə yeni asfalt örtüyünün vurulmasına görə ölkə Prezidenti İlham Əliyevə minnətdarlıqlarını bildirirlər. Yaşadıqları küçədə aparılan abadlıq işlərini dövlətin, ölkə başçısının onlara olan növbəti qayğısı kimi dəyərləndirirlər.
