ADA Universitetinin Qazax Mərkəzində artıq ənənə halını alan Regional Pedaqoji İnnovasiyalar Forumu keçirilib.
AZƏRTAC xəbər verir ki, tədbir ziyalıları, regional təhsil nümayəndələrini, ADA Universitetinin, onun Qazax Mərkəzinin və ADA Məktəbinin pedaqoqlarını bir araya gətirib.
Təhsil tariximizin dəyərlərindən ilhamlanaraq maarifpərvərlər beşiyi olan Qazaxda keçirilən tədbir müasir pedaqoji problemlərə innovativ yanaşmaları irəli sürmək məqsədi daşıyıb. Səmərəli təcrübələri region müəllimləri ilə bölüşmək də tədbirin əsas məqsədlərindən biridir.
İkinci Regional İnnovasiyalar Forumunda təlim-tədrisin keçmişi, qorunan ənənələr müzakirə edilib, təhsilin gələcəyinə nəzər salınıb.
ADA Universitetinin prorektoru, Qazax Müəllimlər Seminariyasının İdarə Heyətinin üzvü Vəfa Kazdal çıxış edərək bildirib ki, irəli sürülən ideya və yanaşmalar təhsil sahəsindəki uğurlarımıza və qarşılaşdığımız çətinliklərin həllinə fərqli bucaqdan baxmağa kömək edəcək. Müzakirələrin sonunda isə yeni fikirlər, praktiki üsullar ortaya çıxacaq.
Azərbaycan Dillər Universitetinin prorektoru Jalə Qəribova çıxışında Azərbaycanlılıq və azərbaycançılıq anlayışlarının milli kimliyin qorunmasındakı roluna toxunub.
Çıxışçı dilimizin milli ideologiyanın əsas daşıyıcısı olduğunu söyləyib. Əlavə edib ki, təhsildə azərbaycançılıq məfkurəsi gəncləri tarixi keçmişi anlayaraq qlobal mühitdə milli kimliklərini qorumağa təşviq edir.
Təqdimat, sual-cavab sessiyaları ilə davam edən forumda Mingəçevir, Füzuli, Laçın, Ağstafa və digər bölgələrdən pedaqoqlar fikir mübadiləsi aparıblar. Onlar şagirdlərin yaradıcı düşüncə tərzinin inkişafında müasir məktəb idarəçiliyinin rolu, inklüziv təhsilin tədris mühitinə təsiri mövzularını müzakirə ediblər.
Tədbir məlumat əsaslı strategiyalar və texnologiyalar vasitəsilə təhsilin dəstəklənməsinə dair təqdimatlarla davam edib.
Layihə və praktika əsaslı tədris ilə müasir, bacarıqlı şagirdlərin yetişdirilməsi metodları da təhlil olunub.
Pedaqoqlar təhsilin inkişafı üçün müəllimlərin də peşəkar inkişaf təlimlərinə cəlb olunmalarının vacibliyini vurğulayıblar. Region məktəblərində problemin həlli yönümlü yanaşma, tədqiqat ənənəsinin təşviqi və innovasiyaların tətbiqi xüsusi vurğulanıb.
Qeyd edək ki, Regional Pedaqoji İnnovasiyalar Forumunun mədəni proqramı çərçivəsində tanınmış kinorejissor, Xalq artisti Oqtay Mirqasımovun “Qisas almadan ölmə. Keçmişdən məktublar” filminin nümayişi olub.
Film barədə məlumat verən rejissor filmin İkinci Dünya müharibəsi illərində Azərbaycandan deportasiya edilən alman koloniyaçıların taleyinə həsr olunduğunu bildirib.
Oqtay Mirqasımov izləyicilərin tədrisdə incəsənətin tətbiqinə dair suallarını cavablandırıb.
Qeyd edək ki, ADA Universitetinin Gəncədə yeni proqramı başlayıb. Proqram Universitetin Qazax Mərkəzinin magistr məzunları, “Bir müəllimin manifesti” proqramının iştirakçıları və regional müəllimlər üçün nəzərdə tutulub. Bu yeni proqram məktəblilərin zehni sağlamlığını dəstəkləmək üçün müəllimlərin peşəkar bacarıqlarının inkişafını nəzərdə tutur.
