Azərbaycan Respublikasının Baş Prokurorluğu qanunvericiliyə uyğun olaraq İlqar Allaz oğlu Hacıyevi, Qurban Cəlal oğlu Məmmədovu, Tural Əlövsət oğlu Sadıqlını və Qabil Əmrah oğlu Məmmədovu İstintaq İdarəsinə çağırıb. Bu şəxslər uzun illərdir xarici ölkələrə sığınaraq Azərbaycan dövləti və xalqı əleyhinə kampaniya aparırlar. Ona görə də, qanunamüvafiq şəkildə həmin şəxslər istintaqa dəvət olunublar və cinayət məcəlləsinin müxtəlif maddələri ilə ittiham irəli sürülüb. Bəs bu şəxslər Azərbaycana ekstradisiya olunsalar, onları hansı cəza gözləyə bilər?
Cumhuriyyet.az xəbər verir ki, mövzu ilə bağlı hüquqşünas Elşad İsayev KONKRET.az-a açıqlamasında bildirib ki, Qabil Əmrah oğlu Məmmədov cinayət məcəlləsinin 24 maddəsi üzrə təqsirləndirilir. Qurban Məmmədova isə daha ağır ittihamlar irəli sürülüb.
“Qurban Məmmədov Azərbaycan Respublikası Cinayət Məcəlləsinin 12.1, 34.2, 220.2, 214-2, 12.1, 34.2, 281.2, 284.2-ci maddələri ilə ittiham olunur.. Bu, çox ağır maddələrdir. Əgər təsdiq olunarsa, bu zaman Qurban Məmmədov hətta ömürlük azadlıqdan məhrumetmə ilə cəzalandırıla bilər.
Siyasi və Hüquqi Strateji Araşdırmalar Mərkəzinin rəhbəri politoloq Xəyal Bəşirov açıqlamasında bildirir ki, mətbuatda bununla bağlı məlumatlar dərc olunub. Bu Azərbaycan qanunvericiliyinə uyğundur.
“Həmin şəxslər başlanmış cinayət işi ilə əlaqədar istintaq orqanına dəvət edilib. Bu şəxslərə münasibətdə fərqli yanaşma yoxdur. Amma bizə məlumdur ki, bu şəxslər uzun müddətdir Avropada Azərbaycan dövlətinə, eləcə də ayrı-ayrı vəzifəli şəxslərə qarşı təhqiredici məlumatlar yayırlar. Eyni zamanda Azərbaycan Konstitusiya quruluşuna, Azərbaycanın dövlət suverenliyinə qarşı açıq təhdid dolu çağırışlar edirlər. Onlarla bağlı müvafiq cinayət işlərinin başlanması üçün addımlar atılıb. Bununla bağlı artıq məlumat verilib. Onların ittiham olunduğu cinayətlərə görə, ağır cəzalar nəzərdə tutulub. Bəzilərində uzunmüddətli azadlıqdan məhrumetmə, hətta ömürlük məhrumetmə ilə bağlı cəzalar nəzərdə tutulub. Əgər həmin şəxslər istintaq orqanına könüllü şəkildə gəlsələr və əməşdaşlıq etsələr, bu, yüngülləşdirici hal kimi nəzərə alınacaq. Məhəkəmə tərəfindən gələcəkdə daha yüngül cəzaların verilməsi mümkün ola bilər. Amma təbii ki, bunun üçün o şəxslərin törətdiyi cinayətlərə bağlı ibtidai istintaq mərhələsində ətraflı araşdırılma aparılmalıdır. Eyni zamanda məhkəmə mərhələsində onların həmin cinayətləri törədib-törətməməsi sübut olunmalıdır. Hər bir halda bu, ibtidai istintaq və məhkəmə prosesinin sonunda məlum olacaq. İndiki mərhələdə onların könüllü şəkildə istintaq orqanına gəlməsi və istintaqla əməkdaşlıq etməsi daha məqsədəuyğundur”.
