Qohum evliliyini qadağan edən qanun bu il iyulun 1-dən qüvvəyə minir. Xala, bibi, əmi və dayı uşaqlarının rəsmi nikahlarına yol verilməyəcək.
Bəs, qeyd olunan tarixə qədər yaxın qohumlar ailə qura bilərmi? Ümumiyyətlə qadağadan sonra ailə quranları hansı cəzalar gözləyir?
Ailə, Qadın və Uşaq Problemləri üzrə Dövlət Komitəsindən Bizim.Media-nın sorğusuna cavab olaraq bildirilib ki, qanun qüvvəyə minən vaxta qədər, yəni iyul ayının 1-nə qədər qohum nikahlarının baş tutması mümkündür:
“Burada bir məsələ var nikah müqaviləsi bağlamaq üçün ən azı bir ay əvvəldən müraciət etmək lazımdır. Yəni bir ay sonra onlara nikah şəadətnaməsi verilir. Belə halda məntiqlə başa düşülür ki, iyun ayının əvvəlindən artıq qohum evliliyi rəsmi olaraq qəbul edilməyəcək”.
Məsələnin digər sual doğuran tərəfi isə cəzalardır. Yəni qohum evliliyi ilə bağlı qərar qüvvəyə mindikdən sonra bu qaydanı pozanları hansı cəza gözləyir?
Vəkil Vüsal Cəfərov məsələ ilə bağlı açıqlamasında qeyd edib ki, 01.07.2025-ci il tarixdən sonra qohumların “vətəndaş nikahında” yaşaması üçün nə İnzibati Xətalar Məcəlləsində, nə də Cinayət Məcəlləsində hər hansı məsuliyyət nəzərdə tutulmayıb:
“Sadəcə olaraq həmin şəxslərin nikahı 01.07.2025-ci il tarixdən sonra rəsmiləşdirilə bilməyəcək”, – deyə vəkil bildirib.
