Sözlər inkar edilə bilər, faktlar əsla…
Bugünlərdə Bakı Təşəbbüs Qrupunun (BTQ) İcraçı direktoru Abbas Abbasov Fransanın ictimai televiziyasında yayımlanmış “Complément d’enquête” (Əlavə tədqiqat) sənədli filmi və onun əsasında dərc olunmuş “Xarici müdaxilə: Azərbaycan 2024-cü ilin may ayında Yeni Kaledoniyada baş verən iğtişaşların alovlanmasına səbəb oldumu?” məqaləsində səsləndirilən ittihamlara cavab verib. Abbas Abbasov qeyd edib ki, Fransa BTQ əleyhinə riyakar verilişlər sifariş verir, Azərbaycan haqqında həqiqətə zidd olan məlumatlar səsləndirir.
Məlumat üçün qeyd edək ki, rəsmi Paris zaman-zaman Azərbaycanı Fransanın daxili işəlrin qarışması ilə bağlı yalanlar tirajlamaqdadır. Halbuki, Azərbaycanın heç vaxt nəinki Fransanın, heç bir xarici dövlətin daxili işinı qarışmadığı, əksinə, özünün bu cür müdaxilələrə məruz qaldığı heç kimə sirr deyil. Sadəcə, Fransa heç bir fakta söykənməyən bu cür böhtanlarla Azərbaycanı dənizaşırı xalqlara verdiyi mənəvi-siyasi dəstəyi dayandırmağa vadar etməyə çalışır. Paris yaxşı başa düşür ki, susqunluq və siyasi-diplomatik korluq fonunda öz zorakılıqlarını daha maneəsiz həyata keçirə bilər. Elə bu səbəbdən də yalan və böhtan yolu ilə Azərbaycanı susmağa, məzlum xalqların haqq səsinin dünyaya çatdırmaqdan çəkindirməyə çalışır.
Makron rejimi ölkəmizi ittiham etsə də, bu ittihamları təsdiq edəcək, Azərbaycanın Fransanın daxili işlərinə qarışmasını isbatlayacaq heç bir fakt təqdim edə bilmir. Çünki belə bir fakt mövcud deyil. Çünki Bakı heç vaxt heç bir dövlətin daxili işinə zərrə qədər də olsun müdaxilə etməyib, onların suverenliyinə hörmətlə yanaşıb.
Bakı isə Fransaya onun Azərbaycanın daxili işlərinə kobud müdaxilə etdiyini isbat edən özü nəhəngliyində fakt təqdim edib. Bu, Dövlət Təhlükəsizliyi Xidmətində (DTX) başladılan cinayət işi üzrə Fransaya casusluqda ittiham edilən Martin Ryan və Azad Məmmədli ilə bağlı faktdır.
İttihama görə, Martin Ryan onu məxfi əməkdaşlığa cəlb edən, sonradan Bakıdan “persona non-grata” elan edilərək qovulmuş Fransanın DGSE (Xarici Təhlükəsizlik Baş İdarəsi) əməkdaşları tərəfindən agent-casus kimi istifadə edilib. Həmin cinayət işi üzrə Martin Ryanla yanaşı, Azərbaycan Respublikasının vətəndaşı Azad Məmmədliyə AR Cinayət Məcəlləsinin 274-cü maddəsi (dövlətə xəyanət) ilə ittiham irəli sürülüb. İttiham edilən şəxslərlə bağl növbəti məhkəmə prosesinin 19 may 2025-ci il tarixində gerçəkləşməsi nəzərdə tutulur.
DTX tərəfindən aşkarlanan və məhkəmə tərəfindən araşdırılan bu fakt Fransanın Azərbaycanın daxili işlərinə qarışdığını, ölkəmizlə bağlı təxribatçılıq fəaliyyəti həyata keçirdiyini göstərir. Təkcə bu fakt sübut edir ki, başqa ölkələrin daxili işlərinə qarışan da, gərginlik və təxribatçılıq toxunları səpən də məhz Fransadır. Və Fransadan fərqli olaraq, Azərbaycan öz ittihamlarını əsaslandırmaq üçün sözlərə deyil, faktlara üstünlük verir, təkzibedilməz sübutlar ortaya qoyur. Rəsmi Bakı Fransa nümunəsi əsasında dünyaya göstərir ki, hüquq və ədalətdən danışmaq, demokratiyadan bəhs etməklə adil və ədalətli davranmaq, demokratik olmaq tamamilə başqa-başqa şeylərdir. Fransanın faktsız ittihamına qarşı Azərbaycanın ortaya qoyduğu faktlı ittiham bunun ən böyük isbatıdır.
Seymur ƏLİYEV
