DTX Akademiyası – Heydər Əliyev ideyalarına sədaqət, vətənpərvər gənclər və peşəkar kadrlar məktəbi…
Məlum olduğu kimi, Dövlət Təhlükəsizliyi Xidmətinin (DTX) Heydər Əliyev adına Akademiyasında məzunların buraxılışı ilə əlaqədar mərasim keçirilib. Mərasimdə çıxış edən DTX rəisi general-polkovnik Əli Nağıyev akademiyada təhsil səviyyəsinin yüksəldilməsinin daim diqqət mərkəzində saxlanıldığını bildirib, habelə, yenicə xidməti fəaliyyətə başlayan gənc kadrların dövlətimizin təhlükəsizliyi üçün əlindən gələni əsirgəməyəcəyinə inamını ifadə edib.
General Əli Nağıyev çıxışında üç mühüm məqam xüsusilə diqqət çəkib. Bunlardan biri Xidmət rəisi tərəfindən Ümummilli lider Heydər Əliyevin təhlükəsizlik orqanlarında formalaşdırdığı irsin əhəmiyyətinin dolğun şəkildə izahı və bu irsi layiqincə davam etdirməyin vacibliyi fikridir. Xidmət rəisi bildirib ki, gənclər bu tarixi irsi qoruyub saxlamalı, yaşatmalı və Ulu öndər dəyərlərinə daim sadiqlik sərgiləməlidirlər.
General Əli Nağıyevin çıxışındakı digər bir mühüm məqam isə akademiyada təhsil alan gənclərin vətənə və Prezident İlham Əliyevin siyasi kursuna sədaqət ruhunda yetişdirilməsi, onların gələcək fəaliyyətlərini məhz bu prinsiplər çərçivəsində təşkil etməsidir.
Xatırladaq ki, milli-mənəvi dəyərlərə bağlı vətənpərvər gəncliyin yetişdirilməsi Prezident İlham Əliyevin çıxış və müsahibələrində dönə-dönə vurğuladığı əsas nüanslardan biridir. Dövlət başçısı 44 günlük Vətən müharibəsində əldə edilən zəfərin də məhz gənclərimizin yüksək vətənpərvərliyi sayəsində əldə olunduğunu bildirib, bu mühüm dəyərin qorunub saxlanılmasının vacibliyinə toxunub. Dövlət başçısının 2023-cü il fevralın 2-də Azərbaycan Gənclər Günü münasibətilə gənclərə ünvanladığı təbrik məktubunda da bu tarixi həqiqətə diqqət çəkərək deyib:
“Azərbaycanda həyata keçirilən gənclər siyasəti yeni nəslin intellektual və innovativ potensialının reallaşmasına hərtərəfli imkan yaratmaqla yanaşı, eyni zamanda, onda dərin vətənpərvərlik ruhu formalaşdırmışdır. Azərbaycan gənci məhz qəlbindəki güclü Vətən sevgisi sayəsində döyüşlərin əsas ağırlığını qəhrəmancasına öz üzərinə götürərək xalqımızın qələbə əzmini dünyaya nümayiş etdirmiş və 44 günlük Vətən müharibəsində Zəfər salnaməsi yazmışdır”.
General Əli Nağıyevin çıxışı göstərdi ki, DTX-nın Heydər Əliyev adına Akademiyasında gənclərimizə sadəcə təhsil verilmir, həm də onların əsl vətənpərvər kimi yetişidirilməsi üçün bütün imkan və vasitələrdən maksimum istifadə edilir.
Xidmət rəisinin çıxışındakı digər mühüm məqam isə Akademiyada təhsil səviyyəsinin sürətlə inkişafı, tələbələrin bilik yarışlarında yüksək nəticələr əldə etməsidir. Hansı ki, Prezident İlham Əliyev gənclərin yüksək təhsil almasını da onların həm şəxsi kariyera baxımından yüksəlişi, həm də dövlətimizə, xalqımıza daha çox fayda verməsi baxımından zəruri hesab edir, öz çıxışlarında dönə-dönə bu məqamı vurğulayır. Buna nümunə olaraq dövlət başçısının 2019-cu ildə Bakı Konqres Mərkəzində Azərbaycan Gəncləri Gününə həsr olunmuş respublika toplantısındakı çıxışını yada salmaq kifayətdir. Dövlət başçısı həmin çıxışında təhsil və vətənpərvərlik faktorlarının önəminə toxunaraq gənlərin bu faktorları birgə mənimsəməsinin mühüm əhəmiyyət kəsb etdiyini söyləyib:
“Gənclər üçün əsas istiqamət, əlbəttə ki, təhsildir. Mən bütün gənclərə üz tutub deyirəm ki, təhsilə çox böyük fikir versinlər. Çünki bugünkü dünyada bilik, savad ön plandadır. Bu gün dünya o qədər sürətlə inkişaf edir, texnologiyalar o qədər sürətlə qabağa gedir ki, bilik, savad olmadan həyatda öz layiqli yerini tapmaq çox çətindir. Gənclər peşəkar olmalıdırlar. İstənilən sahədə işləyən gənclər çalışmalıdırlar ki, öz peşəkarlıqlarını artırsınlar. Bizim gənclərimiz milli ruhda, vətənpərvərlik ruhunda tərbiyə almalıdırlar. Əsrlər boyu bizim xalqımız başqa dövlətlərin, imperiyaların tərkibində yaşamışdır. Ancaq biz milli mənsubiyyətimizi, adət-ənənələrimizi qorumuşuq. Nəyə görə?! Ona görə ki, biz həmişə öz dəyərlərimizə bağlı olmuşuq və bugünkü gənclər daim bu məsələyə çox böyük diqqət yetirsinlər. Azərbaycan dəyərləri bizim üçün ən başlıca dəyərlərdir. Bizi bir xalq kimi, millət kimi qoruyan, əsrlər boyu assimilyasiyadan qoruyan məhz bizim dəyərlərimiz, ana dilimiz, mədəniyyətimiz, ədəbiyyatımız, incəsənətimiz olubdur. Azərbaycan gəncləri mütləq milli ruhda tərbiyə almalıdırlar ki, gələcəkdə dövlət maraqlarını, xalqımızın milli maraqlarını layiqincə qoruya bilsinlər. Hesab edirəm ki, bu iki əsas amil hər bir gənc üçün çox vacibdir”.
General Əli Nağıyevin məzunların buraxılış mərasimindəki çıxışı DTX Akademiyasında gənclərin təhsil və vətənpərvərlik tərbiyəsinə kompleks yanaşıldığını, Prezidentin bununla bağlı tapşırıq və tövsiyyələrinə ciddi şəkildə əməl edildiyini göstərir. Bütün bunlar onu söyləməyə əsas verir ki, DTX Akademiyası sözün həqiqi mənasında Heydər Əliyev ideyalarına sədaqət, vətənpərvər gənclər və peşəkar kadrlar məktəbidir və bu məktəb Ulu öndər dönəmində olduğu kimi, bundan sonra da hər bir azərbaycanlı üçün qürur mənbəyi olaraq qalacaq.
Seymur ƏLİYEV
