Xalqdan oğurlananların xalqa qaytarılmasının vaxtı çatıb
Son günlər ölkə mediasında sabiq MTN şefi Eldar Mahmudov və övladlarının Avropadakı mülkləri ilə bağlı ciddi məlumatlar yayılmaqdadır. Məlumatlardan bəlli olur ki, Britaniyalı hüquqşünas Rory Fordyce uzun illər ölkənin əsas güc orqanlarından birinə rəhbərlik edən Eldar Mahmudovun ailəsi ilə bağlı vəsaitləri lazımi qaydada yoxlamadığı üçün 32,500 funt sterlinq (təxminən 42,000 ABŞ dolları) cərimələnib.
Bu qərar Birləşmiş Krallığın Vəkillərin İntizam Tribunalı (SDT) tərəfindən verilib.
Tribunal Fordyci Eldar Mahmudovun 41 yaşlı oğlu Anar Mahmudovla əlaqəli əməliyyatlar zamanı peşə qaydalarını pozmaqda günahkar bilib. Cərimədən əlavə, Fordyce beş il müddətinə hüquq firmasında hər hansı idarəetmə və ya uyğunluq (compliance) vəzifəsi tutmaq hüququndan məhrum edilib və ona 50,000 funt sterlinq (təxminən 64,000 ABŞ dolları) məbləğində hüquqi xərcləri ödəmək göstərişi verilib.
SDT Fordycein sərvət və vəsaitlərin mənbəyini yoxlama səylərini “səthi, parçalanmış və sadəlövh” adlandırıb. Tribunal qeyd edib ki, anti-pul yuyulması qaydalarının pozulması 2013-cü ildən 2015-ci ilin aprel ayınadək olan dövrü əhatə edib və bu müddət ərzində Mahmudovlar ailəsinin iki iri məbləğdə köçürməsi Taylor Fordyce hüquq firmasının müştəri hesabına daxil olub. Həmin vaxt Fordyce bu firmada direktor vəzifəsində çalışırdı.
Onu da qeyd edək ki, sabiq nazirin Avropadakı sərvətlərinin ümumi dəyəri 100 milyon dollardan artıq qiymətləndirilir. Həmçinin, unutmaq olmaz ki, bu rəqəm media və blogerlərin üzə çıxardığı əmlakların dəyəridir. Ümumilikdə isə, Eldar Mahmudov və ailəsinin Avropadakı mülklərinin say və dəyərinin bu rəqəmdən qat-qat artıq olduğu birmənalıdır.
Mövzu ilə bağlı redaksiyamızı məlumatlandıran mənbənin sözlərinə görə, sabiq nazir və onun Avropadakı əmlakları ilə bağlı son məqalələr bu əmlakların müsadirəsi məsələsini də aktuallaşdırıb. Belə ki, yaxın günlərdə bu əmlakların Azərbaycan dövlətinə qaytarılması istiqamətində hquqi müstəvidə konkret addımların atılması gözlənilir ki, bu da tamamilə məntiqlidir. Çünki qanun da, məntiq də xalqdan oğurlananın xalqa qaytarılmasını vacib sayır. Bu baxımdan, Eldar Mahmudovun Avropadakı əmlakının da dövlətimizin xeyrinə müsadirəsindan daha normal və təbii şey ola bilməz.
