Bu günlərdə Ədliyyə Nazirliyinin Penitensiar Xidmətinin 9 saylı cəzaçəkmə müəssisəsindən Anxeber.az-a daxil olan şikayət məktubu haqda məlumat vermişdik. Məhkumların müraciəti Prezident İlham Əliyevə, Baş nazir Əli Əsədova ünvanlandığı şikayətdə bildirilirdi ki ədliyyə naziri Fərid Əhmədovun adıçəkilən cəzaçəkmə müəssisəsinə baş çəkməsi və məhkumlarla görüşməsi arzulanır, bu məqsədlə ölkə rəhbərliyinin ona bu şəraiti yaratması xahiş edilir. Müraciətdə məhkumlar həmçinin, nazir F.Əhmədov tərəfindən yeni bir komissiya yaradıldığını və bu komissiyanın hazırda qanunsuz fəaliyyət göstərdiyi qeyd edilirdi: “Cəzaların icrası məcəlləsi var. Yəni cəzadan şərti olaraq vaxtından əvvəl azad etmə və ya cəzanın çəkilməmiş hissəsinin daha yüngül cəza ilə əvəzlənməsi. Bu da məhkəmə qərarı ilə həyata keçirilir. Əfsuslar olsun ki, qanunlarımızı saymırlar. Yüzlərlə məhkumun hüquqları pozulmaqdadır. Nəticədə məhkumlara maddi və mənəvi zərər vurulur”.
Məlumat üçün bildirək ki, Azərbaycanda vahid dövlət proqramı əsasında bütün Azərbaycan vətəndaşlarının, o cümlədən, müxtəlif hüquq pozuntusu, həmçinin, cinayət törətmiş vətəndaşların belə hüquq və azadlıqlarının təmin olunması sahəsində də ardıcıl və məqsədyönlü iş aparılır. Azərbaycan Respublikasının Prezidenti 2017-ci il fevral ayının 10-da “Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə” sərəncam imzalamışdır.
Sərəncamda cəza siyasətinin humanistləşdirilməsi məqsədilə iki əsas istiqamət müəyyən edilib. İlk növbədə cinayət qanunvericiliyinin prinsiplərinə və cəza təyin etmənin ümumi əsaslarına ciddi riayət edilməsi, cinayət təqibi və cəzaların icrası zamanı qeyri-prosessual münasibətlərə yol verilməməsi, korrupsiya və vəzifədən sui-istifadə hallarına qarşı mübarizədə daha ciddi tədbirlərin görülməsi nəzərdə tutulub. 9 saylı cəzaçəkmə müəssisəsinin məhkumlarının şikayətindən belə məlum olur ki, bu həbsxanada prezident sərəncamı qulaqardına vurulur. Qüvvədə olan qanunvericiliyə görə, məhkum edilmiş şəxslərin cəzalarının yüngülləşdirilməsi və ya vaxtından əvvəl cəzadan azad edilməsi ilə əlaqədar məsələlərə məhkəmə hökmünün icrası qaydasında məhkəmələr tərəfindən baxılır. Belə ki, Cinayət-Prosessual Məcəlləsinin 509, 513 və 514-cü maddələrində məhkum edilmiş şəxslərin təyin olunmuş cəzalarının qanunla müəyyən edilmiş hissəsini çəkdikdən sonra, onların özləri və ya cəzaçəkmə müəssisəsinin rəhbərliyi tərəfindən cəzanın yüngülləşdirilməsi və ya vaxtından əvvəl cəzadan azad edilməsi ilə əlaqədar cəza çəkildiyi yer üzrə birinci instansiya məhkəməsinə müraciət edə bilmələri nəzərdə tutulmuşdur. Amma nazir tərəfindən yaradılan komissiya əjdaha kimi müraciətlərin məhkəmədə baxılmasının qarşısını kəsir. Müraciətdə sual verilir ki, məhbuslar hansı səbəbdən komissiyadan kəsilib: “Komisisya rəhbəri Ceyhun Tağıyevdir. Ədliyyə Nazirliyinin təyin etdiyi bu şəxs əvvəllər polis orqanlarında çalışıb. Komissiya rəhbəri məhkumu cəmi 30 saniyəlik qəbul edir və bu göz qırpımında Ceyhun Tağıyev adamı necə tanıya bilər? Belə çıxır ki, ona ilahi bir güc verilib, qısa zamanda məhkumu tanıyıb qərar vermək qabiliyyətinə malikdir. Görünür, baxıcılıqla məşğuldur”.
Məktubda qeyd olunur ki, dövlətin qanunları bir şəxsin qərarları ilə idarə olunmur: “Cənab nazir və Ceyhun Tağıyev, qanunlara hörmət etmək lazımdır. Onlar elə fikirləşirlər ki, bura Afrika respublikasıdır, amma yanılırlar. Cənab prezidentdən xahiş edirik ki, nazirin 9 saylı həbsxanaya gəlməsinə şərait yaratsın. Biz dövlətçiliyə sadiq məhkumlarıq, qanunlara əməl edirik. Ona görə də nazir Fərid Əhmədovun gəlib bizim şikayətlərimizi dinləməsini xahiş edirik. Hesab edirik ki, qanunsuz yaradılan komissiya ləğv olunmalıdır. Cəzaların icrası məcəlləsi var və məhkəmə dustaqla bağlı qərar verir. Komissiya cəzalarla bağlı qərar verə bilməz. Komissiya kefi istəyəndə gəlir ki, bu da məhkumların hüquqlarının pozulmasıdır”.
