2-ci Qarabağ müharibəsi veteranı Daşqın Abbasov “Azəriqaz” İstehsalat Birliyinin rəhbərliyi tərəfindən müraciətlərinin cavabsız qaldığını bildirir. Tribuna xəbər verir ki, bu barədə hüquq müdafiəçisi Mirvari Qəhrəmanlı məlumat paylaşıb. Veteranın şikayətini ictimailəşdirən hüquq müdafiəçisi bildirib ki, “Azəriqaz” qazinin problemini dinləmir.
Veteran şikayətində qeyd edib ki, Prezident tərəfindən “Ağdamın azad olunmasına görə” və “Vətən müharibəsi iştirakçısı” medalları ilə təltif olunsa da, hazırda ciddi sosial çətinliklərlə üzləşir. Onun sözlərinə görə, iki dəfə “Azəriqaz” İB-in baş direktoru Azər Məmmədovun qəbulunda olub və yaşadığı problemləri diqqətə çatdırıb: “Yaşadığım Göyçay rayonundan 75 km uzaqlıqda — Kürdəmir Xidmət Sahəsində işləyirəm. Himayəmdə yaşlı atam var. Hər gün bu məsafəni qət etmək mənim üçün həm maddi, həm də fiziki cəhətdən böyük çətinlik yaradır”.
Daşqın Abbasov həmkarlar ittifaqına da müraciət edərək yol xərclərinin qarşılanması üçün yardım istəyib, lakin heç bir dəstək ala bilmədiyini bildirir. Onun sözlərinə görə, iş yerinin Göyçaya — usta və ya mühəndis kimi daha yaxın sahəyə dəyişdirilməsi üçün etdiyi müraciətlər də təmin olunmayıb: “Baş direktordan kömək istəsəm də, heç bir addım atılmadı. Müraciətlərim sadəcə cavabsız qaldı”.
Veteran vurğulayıb ki, Prezident İlham Əliyev dəfələrlə müharibə iştirakçılarına xüsusi qayğı göstərilməsinin vacibliyini qeyd edib. O, həmçinin “Veteranlar haqqında” qanunun 1-ci maddəsinə istinad edərək bildirib ki, veteranların sosial xidmətlərlə təmin olunması qanunvericiliyin tələbidir.
“Təəssüf ki, Azəriqaz rəhbərliyi nə Prezidentin tapşırıqlarına əməl edir, nə də qanunun tələblərinə. Bizim kimi veteranlara bu cür yanaşma yolverilməzdir”, — deyə Abbasov bildirib.
Qarşı tərəfin mövqeyini işıqlandırmağa hazırıq.
