Tanınmış hüquqşünas, vəkil Təyyar Abbaslı millət vəkili, yazıçı Aqil Abbasın doğum günü ilə bağlı paylaşım edib. Həmin təbriki təqdim edirik:
“Bu gün nurani sifətli, mehriban baxışlı gözəl oğlanın 73 (əslində 37) yaşı tamam olur. Aqil Abbası Dahi Məmməd Araz ocağının təmsilçisi kimi tanımışam, “Dolu” filmimə görə ona rəğbətim yaranıb, Qarabağ FK-na azarkeşliyinə görə onunla həmkarlaşmışam, şirin ləhcəsinə, duzlu-məzəli söhbətlərinə, geniş dünyagörüşünə, zəngin mənəviyyatına görə onu sevməyə başlamışam.
Aqil Abbasın qızğın doğma yurd-yuva (Ağdam) sevgisi onun böyük Azərbaycan sevdalısı olmağına nəinki mane olmayıb, əksinə yardımçı olub. Dahi Səməd Vurğun Göyəzən təpəsini dağ adlandıranda ona pişxənd edənlərin özləri təpəyə dağ deməyə məcbur qaldılar. Aqil Abbasın Ağdam və ağdamlılar haqqında publisistik yazısı mənə işğaldan əvvəl əynimə geyinib, müğənni İzzət Bağırovun çuçelo paltarı kimi görünən kostyumu almadığıma görə məni öldürəcəyi ilə hədələyən ağdamlı bazar al-verçisini belə bağışlatdı.
Aqil Abbas el-oba adamıdır. Onu parlamentdə fəaliyyətinə görə qınayanlara bəri başdan deyirəm ki, bataqlıqda, çətinliklə də olsa gül bitər, amma gül ətri saçmaz.
Aqil müəllim, Sizə uzun ömür, can sağlığı yaradıcılıq uğurları arzulayıram.
Seyran Səxavət və Siz bu gündən belə yazsanız da, yazmasanız da təkcə danışıqlarınız bir ədəbiyyatdır, epopeyadır.
Öpürəm”.
