Tanınmış iş adamı Acun Ilıcalının prodüseri olduğu məşhur “Survivor Yunanıstan” yarışmasının iştirakçısı Stavros Floros Dominikan Respublikasında ağır qəza keçirib.
“Qafqazinfo” xəbər verir ki, hadisə iştirakçı nizə ilə balıq ovu etdiyi zaman qeydə alınıb.
Bildirilir ki, Floros dənizdə olarkən turist qayığı tərəfindən vurulub və ağır xəsarətlər alıb.
“Survivor” layihəsinin istehsal qrupu açıqlamasında Stavros Florosun vəziyyətinin ağır, lakin stabil olduğunu bildirib. Məlumata görə, hazırda onun həyati təhlükəsi yoxdur.
İştirakçının atası da mediaya açıqlamasında oğlunun çox qan itirdiyini və sağ qalmasının möcüzə olduğunu deyib. O, təhlükəsizlik qaydalarının pozulması ilə bağlı iddiaları da təkzib edib.
Hadisədən sonra yarışmanın çəkilişlərinin qeyri-müəyyən müddətə dayandırıldığı bildirilib. Qəza ilə bağlı araşdırma aparılır.
