Azərbaycan dövlətindən oğurlanan hər şey Azərbaycan büdcəsinə qaytarılmalıdır…
Azərbaycan Przident Administrasiyasının sabiq rəhbəri, hazırda Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunan Ramiz Mehdiyevlə bağlı hüquqi araşdırmalar davam edir. Təbii ki, bu araşdırmaların nəticəsi olaraq Ramiz Mehdiyevin törətdiyi əməllərə hüquqi qiymət veriləcək, ortaya çıxan və ya çıxacaq faktlar qanun müstəvisində dəyərləndiriləcək.
Bununla yanaşı, Ramiz Mehdiyevlə bağlı araşdırılması gərəkən digər məqamlar var ki, bunlardan biri də sabiq Administrasiya rəhbərinin Avropadakı mülk və obyektlərinin araşdırılması zərurəti ilə bağlıdır. Çünki Administrasiya rəhbərliyində təmsil olunduğu dönəmdə ölkə daxilində saysız-hesabsız mülkə, ucsuz-bucaqsız torpaq sahələrinə yiyələnən Ramiz Mehdiyevin Avropada da çoxsaylı əmlaklara sahib olması ehtimalı böyükdür. Sabiq məmurun xsüsusilə də, Böyük Britaniya, Almaniya, Fransa, Macarıstan, Polşa və s. kimi ölkələrdə daha çox əmlaka sahib olduğu iddia olunur. Bununla bağlı ölkə mediasında da xeyli sayda mqəalə mövcuddur. Odur ki, bu iddiaların dəqiqləşdirilməsinə, Ramiz Mehdiyevin Avropadakı mülk və obyektlərinin Azərbaycan dövlətinin xeyrinə müsadirə edilməsinə ciddi ehtiyac var.
Azərbaycan dövlətinə məxsus olan və dövlətdən oğurlanan hər şey Azərbaycan dövlətinin büdcəsinə qaytarılmalıdır. Qanun da, ədalət də məhz bunu tələb edir. İnanırıq ki, əlaqədar qurumlar bu istiqamətdə də konkret addımlar atacaq və Ramiz Mehdiyevin xaricdəki əmlakının ən azından bir qisminin dövlət bdcəsinə qaytarılması təmin ediləcək.
