ABŞ və Rusiya prezidentləri Donald Tramp və Vladimir Putinin Alyaskada baş tutacaq görüşündən iki gün əvvəl Avropa liderləri və Ukrayna Prezidenti Volodimir Zelenski telefon vasitəsilə ABŞ lideri ilə məsləhətləşmələr aparacaqlar. “Bloomberg” agentliyinin məlumatına görə, bu barədə Almaniya kanslerinin mətbuat katibi Stefan Kornelius bildirib.
“The Wall Street Journal” yazır ki, Avropa ölkələri və Ukraynanın öz sülh planı mövcuddur. Bu plana əsasən:
-Hər hansı sülh sazişi yalnız atəşkəs tam təmin edildikdən sonra imzalanmalıdır;
-Ərazi mübadiləsi yalnız qarşılıqlı razılaşma əsasında mümkündür;
-Əgər ərazi güzəşti edilərsə, Ukrayna birmənalı təhlükəsizlik zəmanətləri almalıdır;
Bu zəmanətlərə NATO-ya üzvlük imkanı da daxil ola bilər.
“Nastoyaşe Vremya” kanalının məlumatına görə, Avropa liderləri Trampla telefon danışığında Rusiyaya təzyiqin artırılması yollarını, mümkün sülh danışıqlarına hazırlıq prosesini, eləcə də ərazi iddiaları və təhlükəsizlik məsələlərini müzakirə edəcəklər.
Xatırladaq ki, ABŞ Prezidenti Donald Tramp və Rusiya Prezidenti Vladimir Putinin görüşü 15 avqust tarixində keçiriləcək. Bu, 2015-ci ildən bəri Putinin ABŞ-yə ilk səfər olacaq. Görüşdə Ukrayna müharibəsinin həlli əsas müzakirə mövzusu kimi gözlənilir.
Rasim Əliyev
“AzPolitika.info”
