Mia.az xarici mətbuata istinadla xəbər verir ki, İranda Gülsüm Əkbəri adlı 56 yaşlı qadının 22 il ərzində (2001-ci ildən 2023-ci ilədək) ərə getdiyi 11 kişini zəhərləyərək öldürüb.
Məlumata görə, İranı çalxalayan bu hadisə Mazandaranda baş verib.
Bildirilib ki, 22 ildir özündən böyük kişilərlə ailə həyatı quraraq onların varidatının mirasçısına çevirilən qadın ən uzun yaşadığı əri ilə iki ilə yaxın bir yastığa baş qoyub: “O, 7-ci ərini isə 43 günə öldürüb”.
İran mediası yazır ki, qadın ərlərini adətən şəkər, təzyiq dərmanlarına cüzi zəhər əlavə etməklə asta-asta ölümə məhkum eləyib: “Qadının hiyləgər qatil olmasını isə ailə dostlarının birinin oğlunun məlumatı əsasında aşkarlanıb. O, Gülsüm Əkbərinin ikinci ərini zəhərləyib öldürməsi barədə şübhəli söhbətlərin dolaşdığını qadının sonuncu əri olan 82 yaşlı Əzizullah Babainin oğluna danışıb. Bundan sonra oğlu atasının şübhəli ölümü ilə bağlı şikayət edib. Qadın araşdrma ilə ortaya çıxarılan dəlillərdən sonra günahını etiraf edib. O, bu qətlləri var-dövlət, miras üçün etdiyini gizlətməyib…”
Xəbərdə deyilir ki, qadın bu günlərdə məhkəməyə çıxarılacaq. Onun edam olunacağı gözlənilir.
Tahir Şəlvəli
MİA.AZ
