Prezident Administrasiyasının sabiq rəhbəri, hazırda dövlətə xəyanət və digər maddələrlə ittiham olunan Ramiz Mehdiyevin hakimiyyətdə olduğu müddətdə ümumi dəyəri on milyonlarla hesablanan külli miqdarda daşınmaz əmlaka sahib olduğu heç kimə sirr deyil. Son bir həftədə ölkə mediasında bununla bağlı yer alan məlumatlar keçmiş aparat rəhbərinin necə böyük sərvətə yiyələndiyini sübut edir. Şübhəsiz, Ramiz Mehdiyevlə bağlı aparılan istintaq işləri çərçivəsində bütün digər məsələlər kimi keçmiş Administrasiya rəhbərinin əldə etdiyi qanunsuz əmlaklarla bağlı da ətraflı təftiş işi aparılacaq, onların aqibəti ilə bağlı uyğun qərar veriləcək. Odur ki, indiki halda bu barədə yalnız müəyyən ehtimalarla danışmaq olar ki, bu ehtimallardan biri də Ramiz Mehdiyevin külli miqdarda sərvət əldə etməsində Əmlak Komitəsinin sabiq rəhbəri Kərəm Həsənovun da pay sahibi olmasıdır. Bununla bağlı cumhuriyyet.az olaraq qeyd edək ki, Ramiz Mehdiyev bütün bu sərvətlərə məhz Kərəm Həsənovun Əmlak Komitəsinin sədri olduğu dönəmdə sahib olub. Bura Abşeron rayonunun Novxanı kəndidə 100 hektardan artıq torpaq sahəsi, çoxmərtəbəli villalar və s. ilə yanaşı, həm də “Ulduz” metrosunun yaxınlığında sovet dönəmindən qalma 2 zavod, Binəqədi rayonu DYP-sinin yaxınlığındakı zavod, Sumqayıt şəhərində 4-5 zavod, müxtəlif təyinatlı fabriklər və s. daxildir.
Onu da qeyd edək ki, bu əmlaklaırn bir çoxu Ramiz Mehdiyevin kürəkəninin adına sənədləşdirilib. Hətta cəmiyyətdə gedən söz-söhbətlərdən belə məlum olur ki, Əmlak Komitəsinin sabiq rəhbərliyi Ramiz Mehdiyev və onun yaxın çevrəsinin adına sənədləşdirilən bəzi əmlaklara görə dövlət rüsumunu belə öz ciblərindən ödəyiblər. Məqsəd siyasi hakimiyyətin əsas fiqurlarından biri olan Ramiz Mehdiyevlə dostluq münasibəti qurmaq, onun çətiri altında öz vəzifələrini qorumaq olub. Bunu da qeyd edək ki, Əmlak Komitəsinin sabiq rəhbərliyi bununla öz məqsədlərinə müəyyən mənada nail ola biliblər.
Çox güman ki, Ramiz Mehdiyevlə bağlı aparılan istintaq işi çərçivəsində dövət əmlakını sabiq aparat rəhbərinə peşkəş edən bu şəxslərlə bağlı da lazımi ölçü götürüləcək, onların əməllərinə qanuni-hüquqi qiymət veriləcək.
