Azərbaycan hərbi hava limanından havalanan və Türkiyəyə istiqamətlənən “C-130” tipli hərbi-nəqliyyat təyyarəsinin Gürcüstanda qəzaya uğraması ilə bağlı yeni versiya açıqlanıb.
Hadisə ilə bağlı keçmiş “C-130” pilotu Bülent Boralı “A Haber” telekanalına müsahibəsində qəzanın mümkün səbəblərini dəyərləndirib.
Onun sözlərinə görə, “C130” təyyarələri Türkiyə Silahlı Qüvvələrinin ən mühüm hərbi nəqliyyat təyyarəsidir. Onun bu şəkildə qəzaya uğraması insanların beynində çoxlu suallar yaradıb:
“Keçmiş C130 pilotu kimi deyə bilərəm ki, təyyarənin mühərriki hələ də işləyirdi. Bu mühərriklər modernləşdirilmişdir. Yaşlarına baxmayaraq, təkmilləşdirilib” .
Keçmiş pilot səbəb olaraq struktur material yorğunluğunu istisna etməyib.
“Konstruksiya materialının yorğunluğu istisna edilmir. Sivil aviasiyada bu səbəbdən çox sayda qəza yaşanıb. Videolarda təyyarənin quyruq hissəsinin ayrıldığı görünür, başqa bir obyektlə toqquşma əlaməti yoxdur. Hər bir təyyarənin müəyyən gövdə ömrü var və texniki baxışlar zamanı bu, diqqətlə yoxlanılır. Amma söhbət 1950-ci illərdə istehsal edilmiş modeldən gedir”, – deyə ekspert bildirib.
Qeyd edək ki, Gürcüstan ərazisində qəzaya uğrayan Türkiyə Hərbi Hava Qüvvələrinə məxsus “C130” tipli hərbi nəqliyyat təyyarəsində olan ekipajın bütün üzvləri həlak olub.
Milli.Az
